Grande presenza galega entre os finalistas dos Premios Fundetec

A Fundación para o Desenvolvemento Infotecnolóxico de Empresas e Sociedade, Fundetec, creu en 2005 uns premios para recoñecer o traballo de proxectos desenvolvidos por Administracións Públicas, organizacións privadas e entidades sen arela de lucro para fomentar o acceso á Sociedade da Información e ao uso das TIC entre os cidadáns que este ano chegan á súa 8ª edición, da que xa se coñecen os 12 proxectos finalistas de entre 216 candidaturas, entre os que destaca a presenza galega nas 4 categorías.
Como Mellor Proxecto de Entidade Non Lucrativa dirixido a PEME, Microempresas e Autónomos figura a Organización dos Artesáns de España coa súa aplicación para iOS e Android de Obradoiros Abertos na súa versión en español, nacida na Asociación Galega de Artesáns, e da que puidemos coñecer numerosos detalles durante a primeira edición do MobileCONGalicia.
Como Mellor Proxecto de Entidade Non Lucrativa dirixido aos Cidadáns está entre os seleccionados o proxecto piloto Destino Empleo, organizado por AGESTIC, e que persegue a formación de mulleres co fin de favorecer a súa incorporación ao mercado laboral ou a posta en marcha da súa propia empresa a través de itinerarios formativos, ofrecendo tamén titorización e asesoramento personalizado específicos.
Como Mellor Proxecto de Entidade Pública ou Privada dirixida aos Cidadáns tamén podemos destacar o Proxecto ABALAR, promovido pola Axencia para a Modernización Tecnolóxica de Galicia (AMTEGA) e a Consellería de Cultura, Educación e Ordenación Universitaria da Xunta de Galicia, que persegue o cambio do modelo educativo a través das TIC, mellorando as competencias da comunidade educativa a partir dunha estratexia integral que contempla a modernización do ensino, a formación do profesorado, a dotación de equipamento nos centros educativos e o desenvolvemento e a utilización de contidos e recursos dixitais.
Finalmente, como Mellor Proxecto de Entidade Pública ou Privada dirixido a PEME, Microempresas e Autónomos, figura entre os finalistas o proxecto de viticultura intelixente LIFE + Viñas Atlánticas, que pretende limitar a problemática causada nos viñedos da D. O. Rías Baixas polo fungo mildiu, para o que se implantou un sistema de xestión integral de viñedos, unha rede de sensores sen fíos e unha plataforma que recolle e procesa os datos para transformalos en coñecemento. Esta iniciativa da Deputación de Pontevedra recibiu no outono o Premio INEO ao Produto ou Servizo TIC máis innovador do 2012 e a semana pasada tamén recibiu o Premio EGANET ao mellor Proxecto Colaborativo Empresarial TIC.
O 21 de febreiro daranse a coñecer en Madrid os gañadores destes premios durante a cerimonia de entrega na que recibirán un trofeo conmemorativo ao que, no caso das entidades sen ánimo de lucro, engadirase un premio en metálico de 15.000 euros.