A piques de comezar a cuarta edición das Xornadas TELGalicia

O luns 6 de maio o salón de actos do compostelán CiTIUS (Centro Singular de Investigación en Tecnoloxías da Información) acollerá a IV Edición das Xornadas TELGalicia, unha xuntanza promovida pola rede de ensino a distancia RedeTELGalicia. O acto en cuestión comezará ás 9:30 horas, cunha conferencia sobre calidade nas aulas impartida por Inmaculada Plaza, profesora titular da Universidade de Zaragoza (Calidade nas aulas: realidade ou utopía?). Emporiso, neste encontro quérese amosar a evolución do concepto “calidade”, empregado no eido empresarial e incorporado ao ámbito universitario nos últimos anos.
Así, no relatorio abrangueranse aspectos como as dificultades de aplicación deste concepto na vida cotiá académica e científica. Asemade, a xornada completarase cunha intervención de Davinia Hernández Leo, profesora do Departamento de Tecnoloxías da Información e as Comunicacións da Universidade Pompeu Fabra de Barcelona. Na súa exposición (TIC para o profesor como (co-)deseñador e (co-)orquestrador de actividades de aprendizaxe), Hernández Leo salientará o rol das TIC á hora de facer máis doadas as tarefas do profesorado, achegando unha visión global das ferramentas para traballar en comunidade, así como programar actividades con alumnos sobre contornas virtuais.
Engadir que a organización das Xornadas TELGalicia lembra que o aforo é limitado. Os interesados en asistir a esta xornada poden enviar un correo electrónico con nome e apelidos a redetelgalicia@gmail.com antes do venres 2 de maio.