Torus, Appentra e Xuntos impóñense no novo certame de proxectos innovadores da USC

Torus, Apprentra e Xuntos foron finalmente as iniciativas que se impuxeron na edición número 13 do Concurso de Proxectos Empresariais Innovadores da USC nas categorías de Mellor Empresa de Base Tecnolóxica, Mellor Empresa Nova e Muller Emprendedora, respectivamente. Os premios, informa a Universidade de Santiago, entregáronse este venres 21 nun acto no salón reitoral do Colexio de San Xerome que presidiu o vicerreitor adxunto de Investigación e Innovación, Pablo Ramil. O galardón á mellor iniciativa tecnolóxica está dotado con 2.000 euros e ata 24.000 euros de financiamento mediante préstamo participativo ofrecido por Unirisco; o de mellor empresa nova con 2.000 euros e o de muller emprendedora tamén con 2.000 euros.
Torus Software Solutions é unha iniciativa que busca dar continuidade ao proxectos que se veñen desenvolvendo na Universidade da Coruña dende 2011 co lema High performance computing for high performance trading. O seu obxectivo será a comercialización de solucións de software HPC (Higher Performance Computing), baseadas en Java, dentro dos sectores financeiros, enerxía, telecomunicacións ou defensa, entre outros, en contornos onde o nivel de latencia das comunicacións é un elemento crítico dentro do sistema de información e do propio negocio das compañías. “As solucións presentadas por Torus”, informa a USC, “permiten eliminar actuais limitacións da máquina virtual de Java incrementando a velocidade de comunicación e permitindo o uso desta linguaxe en contornos de HPC, obtendo altos rendementos de computación”. Torus vén da man do doutor en Física da USC, Ramón Doallo; polos doutores en Informática pola Universidade da Coruña, Guillermo López Taboada e Juan Touriño; e por Robin Harker.
No apartado de Muller Emprendedora, a proposta gañadora foi Xuntos, unha entidade dedicada á atención, formación, investigación e prestación de servizos no eido da saúde mental, constituída por un equipo multidisciplinar de profesores universitarios e persoal académico con formación de doutoramento nas áreas da Psicoloxía, a Psiquiatría, a Xerontoloxía e a Neurociencia. O obxectivo é proporcionar servizos de calidade, baseados na experiencia docente e clínica e nos resultados derivados da investigación.
Na modalidade de Empresa Nova, o premio recaeu como dixemos en Appentra, de Manuel Carlos Arenaz, Jorge Allo e Mª Rosa Vázquez, da Universidade da Coruña. Appentra, da que temos falado en Código Cero para amosar os apoios recibidos polo CDTI e a propia UDC, é unha spin-off da Universidade coruñesa, cualificada como IEBT pola Xunta de Galicia, que traballa no desenvolvemento de software de alta calidade e tecnoloxía avanzada que posibilita un uso extensivo das técnicas de computación de alto rendemento (HPC) en todas as áreas da enxeñaría, a ciencia e a industria. “Dende un punto de vista técnico”, informa a Universidade de Santiago, “o obxectivo xeral é o desenvolvemento de tecnoloxías que permitan a construción dun novo compilador auto-paralelizador fonte a fonte orientado ao mercado HPC denominado ParallWare; deste xeito búscase aumentar o grado de automatización do proceso de desenvolvemento, mellora e migración de aplicacións secuenciais aos modernos sistemas HPC baseados en procesadores multi-core e many-core”. Mediante este proxecto ponse en valor unha nova tecnoloxía disruptiva e exclusiva de Appentra, que proporciona unha solución técnica potente e moderna ao gran reto da paralelización automática de aplicación HPC.