O Outlook de Microsoft chega a iOS a través dunha nova aplicación

A suite ofimática de Microsoft continúa a avanzar na súa achega aos dispositivos móbiles de Apple, e hoxe estrea a aplicación OWA (Outlook Web App) en versións para iPhone e para iPad, que facilita aos subscritores de Office 365 o uso de numerosas prestacións de Outlook dende smartphone ou o tablet. A nova ferramenta permite organizar o correo electrónico, buscar entre as mensaxes recibidas, programar a axenda, ver calendarios compartidos, buscar contactos… mantendo certas medidas de seguridade precisas en contornos corporativos (permitindo, por exemplo, o borrado remoto dos datos).
Aínda que Windows Phone 8 ofrece numerosas prestacións dirixidas á integrarse no fluxo de traballo con Outlook, para non deixar aos usuarios de iOS de lado dende Microsoft decidiron lanzar aplicacións como esta (ou a de Office para iOS que estrearon hai un mes). Deste xeito os clientes de Microsoft poden manter a súa produtividade en calquera momento e lugar.
Esta nova ferramenta, pese a estar dispoñible para iOS, garda unha estética máis propia de Windows Phone, e aínda que polo momento só está dispoñible para clientes de Office 2013, está previsto que máis adiante poida empregarse por parte de usuarios de clientes de servidores Exchange.