A firma arousá Tee Travel lánzase a promover os encantos da Mariña na Rede

Este verán pasado, tivemos alianza galega en materia de turismo. Máis polo miúdo, a que selou a Mancomunidade de Concellos da Mariña coa empresa de Vilagarcía Tee Travel, co obxectivo de potenciar os múltiples atractivos da costa de Lugo como destino turístico, facendo especial fincapé na Internet e nas redes sociais como canles para a devandita promoción. Segundo sinala Tee Travel, o obxectivo do acordo foi o de pór en valor os recursos da zona e difundilos naqueles mercados potenciais de interese. O contrato establece as bases de colaboración para dinamizar o turismo a través de actuacións diversas como unha liña continua de campañas na Internet e nas redes sociais (Facebook ou Twitter) ou a organización de xuntanzas móbiles e itinerantes off line que dean acubillo a tódolos axentes implicados. Sen ir máis lonxe, esta fin de semana temos unha xuntanza desta índole: un famtrip que se desenvolve do 8 ao 10 de novembro e reúne axencias de viaxes, operadores, xornalistas e blogueiros da cousa turística.
O contrato tamén establece, entre outras cousas, a creación dun boletín para enviar tanto a axentes de viaxe como particulares, a edición dun folleto para distribuír nas feiras, ademais das bases de datos propias de clientes directos da axencia arousá, operadores de turismo, colectivos e empresas en todo o territorio nacional e internacional, “facendo especial fincapé nas áreas onde se detecte maior demanda”.
Volvendo ao famtrip desta fin de semana, dicir que a súa finalidade é acadar un mellor coñecemento da Mariña lucense e unha relación máis próxima entre operadores, hostaleiros e axencias, mellorando a comercialización nun futuro. A viaxe comeza este venres día 8 de novembro no Parador de Ribadeo, e os participantes serán recibidos polo presidente da Mancomunidade de Municipios da Mariña Lucense, Alfonso Fuente Parga. Logo presentaranse o destino e o produto, e a continuación celebrarase unha cea no restaurante local San Miguel.
A directora de Tee Travel, Mar Rodríguez Meseguer, resaltou a oferta cultural, natural, paisaxística, gastronómica e etnográfica da devandita comarca da provincia de Lugo que, segundo dixo, “converte o destino nun elemento diferencial dentro da oferta turística galega”. Con motivo do acordo asinado e da xira que comeza agora, incidiu tamén nalgúns dos recursos únicos da Mariña e tamén no feito de que a maior web de viaxes do mundo, Tripadvisor, teña recoñecido a Praia das Catedrais como a segunda mellor praia de Europa e a sexta mellor praia do mundo.