Todo listo para o comezo de Intergalnet no Pazo de Feiras de Lugo

Intergalnet xa está un pouco máis preto. E tanto que é así: comeza este venres 15 ás 20.00 horas e remata o domingo 17 polo serán no Pazo de Feiras e Exposicións de Lugo. Esta semana, por certo, puidemos saber máis detalles do que vai levar implícito este evento, con toda probabilidade a gran festa dixital da mocidade galega deste outono que temos entre mans (tamén coñecida, de xeito máis oficial, como o primeiro Encontro de Gaming e Lecer Electrónico de Lugo). A party, que vén da man da Fundación Pazo de Feiras e Exposicións achega múltiples opcións de ocio para persoas inscritas e asistentes, dende conexión a Internet de alta velocidade ata a posibilidade de asistir a relatorios e obradoiros e competir nunha chea de torneos, algúns máis analóxicos ca outros.
Darase acubillo a máis de 800 persoas (as inscritas oficialmente) máis un número indeterminado (que de seguro será alto) de asistentes en xeral. O evento, soubémolo esta semana, conta co apoio directo da Fundación TIC. Este apoio materializarase, entre outras, na participación da xuntanza de alumnos e bolseiros da Escola de Imaxe e Son de Lugo, co apoio do persoal técnico da Fundación TIC (que realizarán a emisión en streaming da festa a través de intergalnet.com, que tamén poderá seguirse in situ a través de dúas pantallas no Pazo de Feiras e Congresos de Lugo). A colaboración da Fundación inclúe a elaboración dunha reportaxe, a edición dun DVD divulgativo e a rodaxe dunha curta durante a celebración do evento. Asemade, da man desta entidade pertencente á Deputación Provincial, sinalar que xa hai no YouTube e nas redes sociais dende hai días, dispoñibles para a comunidade internauta, dous vídeo-anuncios de promoción do encontro, un lanzado a finais de setembro e outro hai arredor de un mes.

Volvendo ao miolo da xuntanza en cuestión, dicir que se dirixe a sacarlle punta a dúas temáticas de gran interese para a nosa mocidade: as redes e os videoxogos (cousas como FIFA 14, Call of Duty: Black Ops 2, StarCraft 2, League of Legends e Gran Turismo 5, que servirán de escusa para un completo programa de torneos). Por certo que InterGalNet estará ligada á Internet cun caudal de 10 Gbps, asegurando unha conectividade máis que óptima para os usuarios. Lembrar que amais dunha LAN Party tradicional, InterGalNet tamén dará acubillo a unha zona de acampada, unha zona de lecer-espectáculo e espazos para actividades de paintball, exposicións e simuladores. Asemade, ao longo das tres xornadas nas que se desenvolve o encontro, probaranse in situ algunhas das principais novidades do eido dos videoxogos (produtos, consolas) e da informática de lecer, constituíndose en adianto do que vai deparar o mercado os días seguintes (a campaña de Nadal). A xuntanza está organizada pola devandita Fundación e apoiada por un bo número de empresas e institucións galegas, entre as que se contan Intermax, Ozone ou Disco Azul.