Culturgal acolle o sábado o lanzamento oficial de Luzes, nova revista en papel e para tablets

Luzes, revista e web da nosa terra, está estes días novamente de actualidade. E iso que aínda non é unha realidade palpable. E está de actualidade por varios motivos a ter en conta: en primeiro lugar porque xa son menos os minutos que quedan para que saia do prelo o seu primeiro número en papel “si ou si”, como ben apuntan os seus impulsores Manuel Rivas e Xosé Manuel Pereiro, xunto con Iago Martínez en labores de coordinación. En segundo lugar porque o proxecto, tanto a web como a revista como as vertentes tecnolóxicas da mesma (que terá feitura en papel pero tamén para tablets) van ser presentadas na feira Culturgal, que se celebra esta fin de semana no Pazo da Cultura de Pontevedra (a cita, máis polo miúdo, será no Espazo Libro arredor das 18.00 horas do sábado, contándose cos devanditos impulsores do proxecto e máis con Belén Regueira, María Yáñez e Tati Mancebo).
Ademais, tamén se deu a coñecer os días pasados que finalmente acadouse a arelada cifra de cincocentos subscritores para apuntalar a supervivencia de Luzes, cousa conseguida en parte grazas á campaña levada a cabo en revistaluzes.com. Por certo que cada subscritor terá o privilexio de ser tamén fundador, e xa nun terreo de vantaxes que se poden ver e tocar, poderá gozar de tarifas reducidas, adiantos dos contidos e consultas para o bo funcionamento da revista, o seu sostemento e a achega de contidos.
Sinalar que recentemente tivemos en Compostela un adianto de Luzes, e na presentación Pereiro e Rivas describiron a súa iniciativa (revitalizadora dunha prensa galega que arrastra todo tipo de condenas, e entre as non menos importantes atópase a da falta case absoluta de espírito crítico e de independencia con respecto do poder en calquera das súas manifestacións) acompañados de Iago Martínez, que é quen coordina o proxecto. “A nosa”, dixeron “non é soamente unha revista. É un lugar. Un ecosistema propicio para o xornalismo. Para contar as cousas como é debido, con tempo, rigor e campo aberto por diante”. Este sábado en Culturgal péchase un círculo e sen dúbida ábrese outro.