As árbores para o Monte Pindo confírmanse como os agasallos estrela da súa tenda en liña

Os responsables da tenda en liña do Monte Pindo veñen de facer un pequeno reconto do acadado ao longo do seu (aínda) breve percorrido dixital, e as primeiras cifras confirman dúas cousas a ter en conta: que hai moita xente agardando a súa oportunidade para achegar o seu gran de area na recuperación desta importante paraxe natural emprazada en Carnota (asolagada polo lume o pasado verán) e que cada vez apostamos máis -no Nadal- por un modelo de agasallo responsable. De feito, segundo confirma a Asociación Monte Pindo, responsable da iniciativa, “agasallo de moda nas pasadas festas foi sen dúbida unha árbore para o Monte Pindo”. Falamos de doazóns de carballos ou castiñeiros para contribuír a repoboar e recuperar o Olimpo Celta.
O éxito das árbores, ademais, semella que colleu por sorpresa aos integrantes da asociación, aos que nunca se lles pasou pola cabeza que “precisamente ese forse con diferenza o artigo da tenda en liña máis prezado polos visitantes, e que incluso se convertese nunha especie de agasallo de moda, sen dúbida debido ao prezo simbólico dun euro pero tamén á inmensa xenerosidade dun pobo disposto a salvar o seu monte nun tempo tan difícil no plano socio-económico”, comentan.
A día de hoxe a Asociación Monte Pindo Parque Natural leva recadado por este concepto uns 97 euros de 21 persoas, que por suposto se destinarán integramente á repoboación do Olimpo Celta con árbores autóctonas “unha vez que se superen os escollos impostos pola administración autonómica ao proxecto SOS Monte Pindo”.
Segundo engade a asociación, ás boas novas devanditas hai que engadir outra máis: a oferta de colaboración feita por Agasallo.eu, a plataforma de comercio electrónico promovida pola CTNL que se dirixe a fornecer opcións viables para facer agasallos en galego. “Os responsables desta plataforma”, informan, “comunicáronse con nós para integrar desinteresadamente varios dos artigos da tenda e contribuír deste xeito á recuperación do Olimpo Celta”. Os artigos elixidos son o Medallón das Sete Pitas, a Ra de San Antón e o carballo ou castiñeiro no Olimpo Celta.