TADEGA lanza novos obradoiros dirixidos a apuntalar a plena inclusión TIC de todo o noso alumnado

A asociación TADEGA (Tecnoloxías de Atención á Diversidade na Educación Galega), dirixida a fomentar o fluxo de coñecemento tecnolóxico entre estudantes en risco de exclusión social e dixital (facendo especial fincapé nos colectivos de rapaces con diversidades funcionais e cognitivas), vén de anunciar unha nova batería formativa para familias e mestres ao longo de todo o que queda de curso. En palabras do colectivo, trátase “dunha batería do máis completa, económica e dirixida a procurar os aspectos máis prácticos para traballar coa realidade do día a día”. De feito, haberá un pouco de todo: en febreiro achegarase formación sobre comunicación alternativa para persoas con diversidades, en marzo sobre servizos con pictoaplicacións, en abril haberá achegamento ás vantaxes das tablets no eido da atención aos devanditos colectivos, etc.
Segundo informan fontes de TADEGA, estas accións de divulgación TIC insírense plenamente no ideario do colectivo: un compromiso firme para garantir que a tecnoloxía tamén responda á diversidade social que se reflicte a día de hoxe nas aulas. Ou sexa, que do que se trata é de garantir que as TIC non estean desenvolvidas só á medida dunha maioría ou dun promedio de características, senón que abrangan tódalas necesidades e requirimentos. Para TADEGA, é unha gran nova que a tecnoloxía dixital chegase ás aulas, como tamén está a afianzarse a aceptación das diferenzas naturais de cada alumno. “Agora ben”, din dende a asociación, “non podemos esquecer que toca revisar os nosos métodos de traballo, as nosas pedagoxías, co fin de facer que as pezas encaixen e permitir que tódalas alumnas e alumnos sexan quen de adaptarse á nova situación da aula dixital”. Para TADEGA, está claro que a maioría dos docentes e das familias reclama información para pórse ao idea nas novas metodoloxías de ensino. “Aí precisamente”, sinala o colectivo, “é onde entra a nosa asociación”. A batería formativa dos seguintes meses, da que ofrecemos a continuación información detalla, é un exemplo deste compromiso.
· Febreiro (sábado 22). Cambados (Pontevedra). En horario de 10.00 a 14.00 horas. Ferramentas para a comunicación alternativa con persoas con diversidade. Lugar: salón de actos de Exposalnés. Participan Juan J. Fdez. García (presidente de TADEGA), Mª Cruz da Silva Rubio (mestra e presidenta de Por Dereito), Carmen Fernández Cacho (mestra), Mª Carmen Otero Vázquez (nai dun neno con diversidade), Susana Martínez Fieiro (nai dun neno con diversidade).
· Marzo (sábado 15). Teo (A Coruña). Servizos e proxectos de Pictoaplicaciones.com. Contido: a través de xente do GrupoPromedia.es e de Pictoaplicaciones.com farese un percorrido amplo e completo polas aplicacións, ferramentas e servizos que ofertan dende a súa web así como tamén dos seus proxectos máis inmediatos e aínda en cociña.
· Abril (venres 25 e sábado 26). A Coruña. II Xornadas de Tablets Aspronaga. As tablets na Educación e na Atención á diversidade. Lugar: Centro de Formación e Recursos (CFR) da Coruña en Rúa Pepín Rivero, 3 (Edificio UNED) da Coruña. Contido: a actividade vén da man de ASPRONAGA e nela TADEGA participa como colaboradora. Contarase coa presenza de Pere Marqués en labores de relator.
· Maio (sábado 10). Santiago de Compostela. Uso e personalización de ferramentas de Accegal (Pictodroid, MesageTTS, VisualTEC, SubTitleMe, MyKeyboDroid, etc). A relatora será Fátima García Doval, do equipo de Accegal.
· Xuño. Lugo. Cea-coloquio. Verdades e mentiras da inclusión. Con esta actividade, “preténdese dar forma a un debate sen asperezas pero tamén sen rodeos sobre a inclusión e, por extensión, a inclusión dixital”. A intención, sinala TADEGA, é chegar a conclusións prácticas de cara ao futuro.
Por último, sinalar para quen estea interesado en participar nestas accións formativas que é posible formalizar a inscrición a través da web de TADEGA.