O Campus de Ourense acolle a presentación dun informe sobre a situación laboral das Enxeñarías en Informática

O Colexios Profesional de Enxeñaría en Informática de Galicia (CPEIG) vén de desenvolver unha investigación sobre o estado de cousas actual da profesión que representa. Este estudo, que guinda conclusións como o elevado nivel de ocupación laboral das enxeñeiras e enxeñeiros (ou a súa alta satisfacción coa formación académica recibida), vaise presentar este xoves ás 17.00 horas nun acto-xornada divulgativa a celebrar no Salón de Actos Marie Curie do Edificio Politécnico do Campus As Lagoas, en Ourense.
Na cita participarán representantes do Colexio, da Universidade de Vigo (Campus de Ourense) e da Axencia para a Modernización Tecnolóxica de Galicia (AMTEGA), entidade responsable do financiamento da investigación.
Xa nun plano máis concreto, a presentación do informe contará coa presenza de Fernando Suárez, presidente do Colexio Profesional de Enxeñaría en Informática de Galicia (CPEIG); a vicerreitora do Campus de Ourense, María Lameiras; Francisco Javier Rodríguez, vogal do CPEIG e subdirector da Escola Superior de Enxeñaría Informática; Felicitas Rodríguez, xefa do Departamento de Sociedade da Información da AMTEGA; e Marcos Mata, presidente do Colexio Profesional de Enxeñaría Técnica en Informática de Galicia (CPETIG).