Facebook segregará as funcións de mensaxería das súas aplicacións para móbiles

Usuarios de varios países europeos están a recibir a partir de hoxe unha mensaxe de Facebook na que se lles avisa de que nun par de semanas as aplicacións de Facebook para iOS e Android perderán as súas funcións de mensaxería, que pasarán a depender da aplicación de Facebook Messenger, de xeito que, cando premamos o botón para a sección de mensaxes na aplicación matriz, abrirase automaticamente a aplicación de mensaxería.
Dende Facebook aseguran que non estamos ante unha proba, senón que é unha segregación definitiva de ambas aplicacións, coa excepción de móbiles básicos coa aplicación de Facebook precargada, de Windows Phone e de usuarios de tablet (lembremos que a aplicación de Facebook Messenger aínda non está optimizada para tablets), que continuarán a recibir as mensaxes dende a aplicación oficial de Facebook.
Queda agora por ver como recibirán os usuarios esta medida pois, se ben a aplicación de mensaxería é moi cómoda para chatear, o ter que empregar dúas aplicacións de Facebook no móbil pode resultar algo molesto ou confuso para moitos.