Parallels Access permite acceder ás nosas aplicacións de escritorio dende o móbil

Dende hai preto dun ano Parallels conta entre o seu catálogo de produtos cunha solución que facilita o uso de aplicacións de escritorio directamente dende o iPad, como unha importante evolución das aplicacións de control remoto, que se adaptan ás interfaces táctiles de xeito maxistral, e que dende hoxe ábrese a novos dispositivos, pois Parallels Access xa está dispoñible para Android e iPhone, achegando o control remoto de ordenadores (PC ou Mac) dende smartphones.
Parallels Access é unha solución moi importante para usuarios que poidan precisar acceder a algún documento que teñan no ordenador da casa ou no traballo cando estean en mobilidade, evitando innecesarios desprazamentos, e que aínda que inicialmente só podía gozarse dende dispositivos con grandes pantallas, agora adáptase aos teléfonos, incrementando considerablemente a súa versatilidade.
Esta ferramenta tamén integrou a posibilidade de identificarse mediante Facebook (facendo o proceso máis rápido e sinxelo), permite lanzar aplicacións de escritorio directamente dende atallos no escritorio dos dispositivos con Android, estrea un explorador de documentos do ordenador dende iOS, as aplicacións de escritorio que empregan micrófono tamén responderán agora ao micrófono do iPhone e do iPad, e será posible mudar a resolución de pantalla para adaptarse aos distintos tipos de trebellos.
Parallels Access ten un prezo de 17,99 euros/ano para un usuario e ata 5 ordenadores, ou de 26,99 euros por 2 anos, existindo a partir do 31 de xullo unha solución para empresas que terá un prezo de 49 euros/ano para un número limitado de usuarios (con 5 ordenadores por conta).

Vídeo promocional de Parallels Access