A galega Mega Sistemas, premiada pola súa achega tecnolóxica no sector da saúde en Panamá

A empresa galega Mega Sistemas, con sedes en Vigo, vén de obter xunto con Cable & Wireless Panamá un importante recoñecemento ao seu labor no eido da implantación de ferramentas informáticas para corporacións e entidades. Máis polo miúdo, trátase do Premio Innovación en Servizos de Negocios (GTB Innovation Awards), outorgado polo proxecto de sistemas de xestión de activos da Caixa de Seguro Social de Panamá, desenvolvido a través da aplicación Mansis XXI de Mega Sistemas e orientado a mellorar a produtividade dos equipos médicos.
Os GTB Innovation Awards entregáronse o pasado 14 de maio en Londres, sendo o recoñecemento á iniciativa na que participa a firma galega recibido por Lachan Johnson, director de Marca e comunicacións de Cable & Wireless.
Segundo informa a empresa viguesa e reflicte a asociación INEO da que forma parte, a nova plataforma informática instalada na Caixa do Seguro Social de Panamá diríxese a fornecer un estrito control dos activos corporativos, especificando a súa data de compra, localización, periodicidade de mantemento preventivo e caducidade, xerando de forma automática a orde de servizo de mantemento ou substitución ao remate da súa vida útil. Estas funcións e vantaxes, sinálase, redundan claramente en beneficio dos asegurados, que terán a disposición os equipos en funcionamento óptimo. En definitiva, con Mansis XXI contrólanse os activos de cada departamento, o proceso de solicitude de servizo, o proceso de orde de traballo, a xestión dos almacéns, o custo das ordes de traballo e dos equipos, así como o historial das intervencións.