Tim Cook lembra a Steve Jobs no seu cabodano

Onte celebrouse o terceiro cabodano do pasamento de Steve Jobs, e para conmemorar tal data, o actual director xeral da compañía, Tim Cook, remitiu unha carta aos traballadores da compañía na que lembra a figura que tan representativa foi na historia de Apple, e que supuxo un importante pulo na revolución tecnolóxica que estamos a vivir, xogando un importante papel á hora de mudar os nosos hábitos de consumo de contidos.
Cook asegura esperar que os seus colaboradores “tomen un momento para apreciar os moitos xeitos nos que Steve fixo o noso mundo mellor. Os pequenos aprenden de novos xeitos grazas aos produtos que soñou. As persoas máis creativas do mundo os usan para compor sinfonías e cancións pop, e para escribir de todo, dende novelas ata poesía e mensaxes de texto. O traballo que produciu Steve durante a súa vida é o lenzo no que os artistas crean agora a súas obras mestras”. Engade que “a visión de Steve esténdese máis aló dos anos que viviu, e os valores sobre os que construíu Apple estarán sempre entre nós. Moitos dos proxectos e ideas nos que estamos a traballar hoxe comezaron despois da súa morte, pero a súa influencia neles e en todos nós é indubidable”.
Tim Cook rematou a súa misiva agradecendo aos traballadores de Apple por axudar a levar o legado de Steve Jobs ao futuro.