Mailbox abre ao público a súa beta para OS X

Dende o ano pasado a aplicación Mailbox busca revolucionar o xeito de empregar o correo electrónico, estando presente en dispositivos móbiles con iOS e Android, pero este método de xestionar o noso e-mail está a dar un importante salto, xa que nas últimas horas estrearon unha versión de proba pública de Mailbox para o escritorio, que polo momento pode descargarse para OS X, sen precisar de invitación nin dunha ligazón especial.
A versión de Mailbox para OS X leva en probas dende hai varios meses, e agora que abre a beta ao público dáse a entender que a aplicación para os ordenadores de Apple está a piques de completar o seu desenvolvemento, contribuíndo así a mellorar a produtividade do correo electrónico dende o ordenador.
Esta ferramenta permite que apartemos as mensaxes que non vaiamos a atender rapidamente, para permitinos centrarnos no importante, e no escritorio a aplicación enriquece a experiencia coa función de auto-swipe, que administra a caixa de correo dun xeito semellante aos filtros de Gmail, aprendendo a aplicación sobre os tipos de mensaxes que o usuario arquiva ou non habitualmente, de xeito que as mensaxes irrelevantes xa desaparecen da vista de xeito automático. Tamén se conta coa posibilidade de demorar mensaxes para atendelas máis tarde.