As Xornadas Técnicas Galegas analizarán nesta terceira edición as Cidades Intelixentes

Dende Código Cero xa dabamos conta da cita que terá lugar no Auditorio do Palacio de Congresos Mar de Vigo os vindeiros 25 e 26 de novembro. Estamos a referirnos á terceira edición das Xornadas Técnicas Galegas, centradas desta volta nas Cidades e Comunidades Intelixentes (Smart Cities & Communities), organizadas e impulsadas polo Concello de Vigo, a Axencia da Enerxía de Vigo (FAIMEVI), o Ilustre Colexio Oficial de Enxeñeiros de Galicia (ICOIIG), o centro tecnolóxico coruñés CITIC ou o Cluster TIC Galicia. Alí atoparanse profesionais das TIC e da eAdministración para afondar en cuestións como o potencial e posibilidades das urbes conectadas do futuro.
E a quen pode interesar esta xuntanza? Pois de xeito principal está encamiñada a profesionais do sector, expertos de recoñecido prestixio, empresas líderes a nivel estatal e administradores municipais, nos que se debaterá e profundará de maneira integradora diferentes aspectos relacionados coas novas tecnoloxías no eido das Cidades Intelixentes (Smart Cities), a xestión intelixente dos recursos e a transformación urbana que isto significa. Para aqueles interesados en asistir como visitante profesional cómpre dicir que o prazo de inscrición xa se atopa aberto. Para os asociados a cota de inscrición con desconto é de 50,00 €/persoa (IVE incluído) que dá dereito a:
· Asistencia a todas as sesións (conferencias e relatorios), café e xantar no lugar de celebración das xornadas (dous días), e desconto dun 20% na tarifa do aparcamento do auditorio.
· Recibir a documentación en formato electrónico, acreditación, portadocumentos, bolígrafo, cartafois e certificado de asistencia.
Para asistir é preciso encher un formulario de inscrición. Engadir que o prazo de inscrición fica pechado dende o 7 de novembro. A partir desta data a organización non garante a entrega do material, tampouco será aplicable o desconto. Para máis información pódese visitar a web do evento, onde aparece o programa.