Galicia, no sexto posto estatal en canto a empresas tecnolóxicas

O primeiro estudo sobre o hipersector TIC na Comunidade, elaborado polo Observatorio da Sociedade da Información en Galicia (OSIMGA), adscrito á Axencia para a Modernización Tecnolóxica de Galicia (AMTEGA), vén de amosar as súas conclusións situando a Galicia no sexto posto estatal con máis de 3.100 empresas tecnolóxicas e de contidos, achegando emprego a 20.601 persoas. Máis polo miúdo, o hipersector TIC galego está composto nun 70,7% por empresas do sector tecnolóxico e nun 29,3% por empresas do sector de contidos e servizos audiovisuais.
As actividades de programación, consultaría e outras actividades relacionadas coa informática son as que aportan un maior número de entidades ao subsector TIC (1.223), o que representa un 38.7% no conxunto do tecido tecnolóxico-dixital, mentres que as edicións de libros, xornais e outras actividades editoriais son as máis numerosas do subsector Contidos e representan o 12.6% do conxunto do hipersector TIC.
A estrutura empresarial do eido empresarial avaliado caracterízase pola presenza maioritaria de microempresas, así catro de cada cinco contan con dous ou menos asalariados no seu cadro de persoal.
O volume de exportacións do hipersector TIC superou os 50 millóns de euros no ano 2013. O 94,3% das exportacións corresponden ao subsector TIC e estas TIC están centradas fundamentalmente en equipos de telecomunicacións.
De falarmos de importacións do sector TIC, estas superaron ás exportacións, o que motiva que tanto no propio sector tecnolóxico como no conxunto do hipersector TIC, a balanza comercial resulte negativa.
En canto ao sector de contidos, dicir que presenta un significativo potencial do comercio exterior cunha balanza comercial positiva, salientando as exportacións das actividades relacionadas coa edición de libros, xornais e outras actividades editoriais, que superan os 2.600.000 euros
Alén disto, o estudo abrangue tamén a innovación tecnolóxica na totalidade do tecido empresarial galego. Un total de 1.092 empresas galegas de 10 ou máis traballadores realizaron actividade innovadora no ano 2012. Cómpre dicir que a nivel estatal, Galicia ocupa a sexta posición na listaxe de empresas innovadoras no ano 2012.
O investimento en I+D no ano 2012 por parte das empresas galegas ascende a máis de 487 millóns de euros, o que supón o 3.6% do total estatal.
Engadir, por último, que Galicia é a sétima Comunidade Autónoma con maior número de traballadores en I+D a xornada completa, dando emprego a 9.509 traballadores. No período 2010-2013 rexistráronse no hipersector TIC galego 11 patentes e 2 modelos de utilidade.