A aula de actividades do punto CPAE 2.0 de PontevedraA través da Deputación de Pontevedra chegábanos a nova de que case 800 empresas da provincia de Pontevedra recibían formación sobre diferentes aspectos das novas tecnoloxías aplicadas aos negocios a través dos cursos organizados polo Centro Provincial de Asesoramento Empresarial 2.0 e desenvolvidos nas 6 oficinas abertas ao público en diferentes comarcas da provincia. Facendo un reconto, ata hoxe, son 204 eventos de capacitación tecnolóxica os levados a cabo, cunha suma total de máis de 400 horas de formación, nos cales participaron 763 responsables de empresas. Asemade, nos 8 meses de funcionamento (situados en Pontevedra, Vigo, Cambados, O Porriño, Ponteareas e Lalín) empregaron os servizos dispoñibles máis de 524 empresas, das cales o 75% son microPEME e o 25% son profesionais autónomos. Cómpre engadir que na actualidade, informa o organismo provincial, “un total de 273 empresas e autónomos están a recibir asesoramento personalizado e de continuidade para a achega de novas tecnoloxías ao seu negocio”. En canto ao perfil dos profesionais que acoden ao CPAE na procura de asesoramento, para resolver cuestións puntuais ou para coñecer diferentes produtos e solucións tecnolóxicas, son maioría os homes (o 55% do total). “Na maioría dos casos”, sinala a Deputación, “é persoal directivo con idades abranguidas entre os 30 e 45 anos e os sectores que mais demandaron estes servizos foron o sector comercio (cun 24%) e o da construción (cun 12%) seguidos polas pequenas empresas de ámbito pesqueiro e gandeiro”. Para rematar, é preciso informar que co obxectivo de seguir facilitando a formación dos emprendedores e dos pequenos empresarios e autónomos, ao longo desta semana, estanse a desenvolver outras 18 xornadas de capacitación, que están a ter como eixo central os certificados dixitais e a sinatura e o DNI electrónico; a plataforma provincial de comercio en liña; as ferramentas e recursos TIC para empresa e as redes sociais, entre outros. Cada un dos centros distribuídos na provincia impartirá 3 eventos cada semana, que se poden consultar na ligazón cpae20.depo.es/es/eventos.
