En marcha dende Vigo un innovador laboratorio que nos permite amañar o noso dispositivo: Yoloreparo

Dende Vigo chéganos unha iniciativa cen por cen innovadora e, polo tanto, pioneira. Trátase dun servizo que nos permite ser algo máis que usuarios dos nosos trebellos tecnolóxicos: sermos tamén reparadores dos mesmos cando algo vaia mal (cousa probable nestes tempos de fluxo continuo de datos, funcionalidades a pleno rendemento e programadores malware dispostos a espallar o máximo posible as súas pólas). O servizo vén da man da empresa viguesa SAT e, segundo informan os seus responsables, estamos perante o primeiro laboratorio de Europea onde os clientes poden arranxar os dispositivos móbiles de seu en poucos minutos. Chámase Yoloreparo e achéganos entre outras cousas uns boxes de feitura futurista no número 219 da rúa Travesía de Vigo: un local aberto aos usuarios con todas as ferramentas precisas para unha boa posta a punto así como manuais actualizados ao seu dispor e un técnico especializado para “liquidar calquera dúbida que xurda”.
Segundo engaden dende SAT respecto das comodidades que se achegan e os custes económicos establecidos, os usuarios poderán ter os seus dispositivos reparados “a un custo moi inferior ao que lles cobraría un servizo técnico, pois son eles mesmos quen realizan a reparación”. Con todo, aínda hai unha vantaxe máis, explican, posto que grazas ao sistema de manuais actualizados de Yoloreparo “calquera cliente pode emendar os aparellos TIC de terceiros, acadando así unha actividade emprendedora a un custo mínimo e cun amplo mercado potencial”.
Segundo informa Daniel Graña, xerente de Yoloreparo e fundador de SAT, boa parte dos aspectos máis técnicos das novas tecnoloxías están ao alcance de todos e cada un dos usuarios. Así, sinala, “hoxe en día calquera pode cambiar unha pantalla, colocar un altofalante ou instalar unha batería nova”. En base a isto, SAT tomou a decisión de adaptar o seu propio servizo técnico aos novos tempos e non menosprezar a habilidade dos usuarios, “dándolles as ferramentas para que sexan eles mesmos quen reparen os seus dispositivos e á vez abran unha porta a unha lucrativa actividade emprendedora”.