Abertal impulsa a comunicación en liña de Códice e Necos Moda Infantil

Abertal, a firma de Carballo que dirixe Manuel Pan, vén de informar de dous novos traballos de comunicación e desenvolvemento web para empresas da nosa terra. O primeiro dos traballos foi o deseño e posta en marcha da nova web de Códice, que é unha empresa da Coruña adicada á encadernación artesanal e especializada nas publicacións en formato de luxo. “Con esta páxina”, sinalan dende Abertal, “o que se pretende foi establecer unha nova canle de comercialización dos produtos e servizos de Códice, tanto para promocionalos a nivel local como para iniciar a a súa comercialización a través da Rede”.
Un dos obxectivos da plataforma web da empresa de encadernación foi o de fornecer “un servizo personalizado” para os usuarios da Internet, un reto complicado, sinala Abertal, para o que se botou man do desenvolvemento de diversos formularios a través dos que se pode realizar un proxecto totalmente personalizado, calcular un orzamento a medida e mesmo realizar o pedido en liña. A proposta compleméntase cunha tenda online dende a que se distribúen todo tipo produtos relacionados de papelería como selos, cartafoles, etc.
O outro dos traballos dos que damos conta foi o impulso web e posicionamento local de Necos Moda Infantil, unha tenda do sector téxtil que Abertal está a levar ao ámbito das actividades de captación en redes sociais, á procura de máis e mellor visibilidade en buscadores e (probablemente) ao eido do comercio electrónico. “Neste proxecto”, explican dende a firma de Carballo, “séntanse as bases tecnolóxicas para que este pequeno e especializado comercio poida dentro duns meses analizar se está preparado para dar un paso definitivo á venda en liña”. Polo de agora, o que si se puxo en marcha foi unha “coidada presencia web”, sinala Abertal, cun outlet na plataforma Prestashop. Logo iniciarase unha campaña na Rede dirixida ao cliente de proximidade.