Unha web de Vilagarcía sitúase no posto número 1 do sector vinícola

A principal ferramenta a nivel mundial en estimación de tráfico de sitios web, Alexa (propiedade de Amazon), vén de sinalar á web Vinetur.com como a líder mundial dos sitios dixitais en español adicados ao sector do viño. Así, a web de Vilagarcía de Arousa rexistrou 7.767.793 usuarios únicos no último ano (agosto 2014-agosto 2015), 1,2 millóns máis que o mesmo período do ano anterior. A revista dixital de viños máis senlleira da Rede medrou no dito período un 18% respecto ao período anterior, e prevese que ao finalizar o ano medre un 20%.
Segundo informan os responsables da páxina arousá, “os datos de Alexa confirman o liderado de Vinetur entre as páxinas en fala hispana de todo o planeta”, segundo cifras correspondentes a usuarios tanto de computador coma dos diferentes dispositivos móbiles (medición multiplataforma). De acordo con esta medición, a diferenza de Vinetur.com co seu inmediato competidor (verema.com) pode apreciarse nunha gráfica de estimación de tráfico desenvolvida pola firma de Amazon.
Cómpre sinalar que o éxito de Vinetur viuse impulsado pola estrea dun novo deseño da web adaptado a multidispositivos (móbiles intelixentes, tabletas,…); unha nova edición de contido; e ao grande incremento de usuarios que proveñen das redes sociais así coma de subscritores por email, unha opción cada vez máis demandada en Vinetur.