As TIC e as súas vantaxes na xestión de refugallos, eixe dunha xornada da CEL

A xestión efectiva e rendible dos refugallos e o aproveitamento dos mesmos ten que pasar, por forza, polas novas tecnoloxías da información. Os motivos son moitos e variados, pero en certa maneira son semellantes aos que alentan as maridaxes enerxía-TIC ou motor-novas tecnoloxías. Para coñecer estas razóns ao detalle, a Confederación de Empresarios de Lugo, CEL, organiza o vindeiro 1 de outubro un encontro con profesionais galegos do devandito ámbito dos residuos e as diferentes maneiras tecnolóxicas de xestionalos mellor, e mesmo de aproveitalos para facer máis riqueza. A cita desenvólvese de 16.30 a 18.30 horas e nela intervirá Miguel Varela, director de Teimas, quen falará entre outras do seu software Teixo (que axiliza os trámites nos diferentes procesos de tratamento de refugallos).
Tamén intervirá Fernando Asperilla, xefe do Servizo de Planificación, Prevención e Información da Secretaría Xeral de Calidade e Avaliación Ambiental, que explicará os logros do Sistema de Información de Residuos de Galicia (SIRGA), amosando tamén as particularidades da nova Plataforma Galega de Información Ambiental (GAIA), portelo único para permitir ás compañías atender e cumprir coas súas obrigas co medio ambiente.
A xornada vén da man da CEL e de SOGAMA e forma parte dun programa divulgativo común e virtude do cal ambas as entidades organizan actividades formativas en materia de medio ambiente e desenvolvemento sustentable dirixidas tanto a empresarios e emprendedores, como a traballadores e desempregados. O obxectivo do encontro do día 1 é o de analizar o papel facilitador das TIC para resolver problemas na área ambiental, o seu impacto na contorna ambiental, a súa función no ámbito da economía circular e a súa contribución ao uso máis eficiente dos recursos e enerxía.