IBM informa que os seus novos servidores Power Linux traballan máis e a menor custe

IBM, multinacional fabricante TIC, vén de anunciar a dispoñibilidade dos seus novos servidores con software libre (servidores Linux) desenvolvidos o obxectivo de permitir a realización de analíticas de datos intensivas “de xeito máis rápido e sinxelo que cos servidores x86”. Os novos servidores LC Power Systems foron deseñados con tecnoloxía dos socios da OpenPower Foundation, que inclúen firmas open source de primeiro nivel e do talle de Canonical (responsable do sistema operativo Ubuntu, hoxe en día unha das grandes alternativas a Windows), Mellanox, NVidia, Tyan e Wistron. Lembrar que a OpenPOWER Foundation é unha organización con máis de 150 membros de todo o mundo que fomenta o desenvolvemento aberto sobre a arquitectura de procesadores Power de IBM.
Segundo lembra a multinacional, os servidores LC ofrecen á extensa comunidade Linux procesadores Power cun rendemento superior, especialmente para cargas de analítica de datos, cálculo na nube e computación de alto rendemento (HPC). Para facérmonos unha idea da capacidade destas tecnoloxías, IBM recorda que un un novo LC Power Systems é quen de levar a cabo cargas de traballo Apache Spark (incluíndo a análise de feeds de Twitter, visitas a páxinas web de streaming e outro tipo de analíticas de datos intensivas) por menos da metade de prezo respecto doutros servidores do mercado, proporcionando ademais aos clientes un rendemento 2,3 veces superior por cada euro investido. Ademais, o deseño eficiente do servidor LC Power Systems ofrece un 94% máis de capacidade en cargas de traballo Spark no mesmo espazo físico que outros servidores comparables do mercado, engade a compañía.
A gama de servidores LC Power Systems, que estará dispoñible ao longo deste ano, ofrecerase en tres modalidades diferentes: Power Systems S812LC, Power Systems S822LC, e Power Systems S822LC, para computación de alto rendemento.