EGATEL amplía a rede de TDT Arxentina con transmisores de alta eficiencia e banda larga

A firma de fabricación tecnolóxica EGATEL, recentemente distinguida no informe Ardán como a empresa galega máis innovadora, vén de ser elixida pola tecnolóxica INVAP (Investigación Aplicada) para prover transmisores de alta eficiencia – banda larga da serie WHET (Wideband High Efficiency Tranmsitters), na ampliación da rede de Televisión Dixital Terrestre operada pola compañía de telecomunicacións ARSAT en Arxentina. Segundo informa a firma con sede na Tecnópole de Ourense, o proxecto consiste na subministración de dezasete transmisores de TV, modelo TLWH7802.
Entre os factores que inclinaron a INVAP a decantarse pola tecnoloxía de EGATEL atópanse os seguintes: a longa e completa andaina da empresa galega deseñando e fabricando transmisores de TV dixital, ao que cómpre sumar a súa experiencia no desenvolvemento de equipos de alta eficiencia e a súa capacidade para adaptarse ás demandas dos seus clientes e dos usuarios ao onde se dirixen as súas tecnoloxías.
Segundo explica a firma galega, “os transmisores de EGATEL de alta eficiencia son a mellor opción por ofrecer unha relación calidade-prezo difícil de superar”. Entre os puntos fortes destes transmisores atópanse os seguintes: “A optimización da eficiencia enerxética en toda a banda UHF a través da tecnoloxía Doherty, o deseño compacto e modular, a redundancia de fontes de alimentación ou a posibilidade de realizar cambios de canle sen necesidade de facer ningunha modificación nos amplificadores reducen moito o custo total na instalación e ao longo da vida do transmisor”.