Gradiant contribúe a definir o futuro do sector primario europeo a través da Internet das Cousas

A Alianza para a Innovación en Internet das Cousas (AIOTI) vén de publicar os doce informes que conteñen as Recomendacións para o futuro traballo colaborativo en Internet das Cousas dentro de Horizon 2020. Estas recomendacións de alcance europeo cobren as principais áreas de interese en materia de tecnoloxías para os obxectos conectados (as tecnoloxías IoT) entre 2016 e 2017. Os documentos foron elaborados polos once grupos de traballo que xuntan forzas na AIOTI: grupos formados por expertos da industria a alto nivel, innovadores, usuarios finais, especialistas en regulación e representantes sociais. O Grupo de Traballo 6, o que centra esforzos no ámbito da Internet das Cousas aplicada ao Smart Farming and Food Security, está liderado polo centro tecnolóxico Gradiant. Para o centro tecnolóxico, o ámbito da IoT para as actividades que abrangue o concepto farming é un “eido de notable interese para Galicia, cuxo sector primario representa unha parte importante do seu PIB”.
Sinalar que o concepto de Smart Farming engloba a aplicación de recursos intelixentes en boa parte do sector primario, non só na contorna agrícola, senón tamén, por exemplo, na acuicultura e na gandería. Polo que respecta a Food Security, é un concepto que comprende seguridade alimentar pero tamén abrangue cuestións complementarias como control de alimentos ou seguimento do mesmos (o que se coñece como rastrexabilidade ou trazabilidade: procesos e tecnoloxías para coñecer o histórico, o emprazamento e a traxectoria dun produto ao longo da cadea de subministros).

O centro tecnolóxico galego recorda que durante este últimos seis meses, o grupo que lidera Gradiant traballou no documento de recomendacións para a Comisión Europea, de face a implantar proxectos piloto a gran escala dentro de Horizon 2020. Sobre o potencial desta liña de desenvolvemento de iniciativas, o responsable do Grupo de Traballo 6 (e director xeral de Gradiant), Luis Pérez Freire, fai fincapé na súa vontade global e integradora e cóntanos que as aplicacións de IoT para o sector primario “non só deberán estar dirixidas ás explotacións máis grandes e convencionais, senón que deben ser capaces tamén de ofrecer as mesmas solucións para todo tipo de explotacións”. Segundo engade, o informe céntrase nas oportunidades que ofrecen as tecnoloxías que nos interconectan cos obxectos nas súas aplicacións agrícolas, e os retos para desbloquear todo o seu enorme potencial en integracións a gran escala.
Como lembraremos, a Alianza para a Innovación en Internet das Cousas (AIOTI), posta en marcha grazas ao impulso da Comisión Europea, reúne a varias das maiores compañías tecnolóxicas que operan en Europa, como Samsung, Siemens, Telefónica, IBM, ou Cisco; ademais de centros tecnolóxicos e de investigación punteiros nos seus ámbitos de actuación a nivel europeo, como por exemplo Gradiant, que lidera como dixemos a fronte de traballo sobre granxas intelixentes.
Salientar que entre os obxectivos marcados pola Comisión Europea para os Grupos de Traballo de AIOTI destaca a elaboración de recomendacións para o desenvolvemento dunha serie de pilotos de innovación en IoT a gran escala, que serán financiados polo programa de innovación europeo Horizon2020 e que comezarán a partir de 2017. Eses documentos de recomendacións destinados á Comisión foron feitos públicos os días pasados e remitidos ao órgano de goberno da UE.
A AIOTI púxose en marcha o 4 de febreiro de 2015 baixo os auspicios da industria da Internet das Cousas e a Comisión Europea, creándose con ela “unha nova voz global para a IoT en liña cos valores europeos”. A industria, a través desta alianza, comprometeuse a establecer o ecosistema da Internet das Cousas “máis dinámico e áxil no mundo”, para mellorar a vida das persoas, para axudar a liquidar os retos da sociedade, e para estimular o crecemento. A AIOTI é hoxe en día o meirande foro de especialistas e desenvolvedores do ámbito IoT no continente. Entre os seus cometidos áchanse os de identificar os atrancos para a implementación da era dos obxectos conectados, as lagoas na estandarización e a normalización, amais de promover sinerxías xuntando aos distintos actores involucrados de todos os sectores: telecomunicacións, Internet, automotriz, fogar, sector primario, saúde e Cidades Intelixentes.