Unha campaña en liña pide que Netflix inclúa contidos en galego

Tras levar preto dun mes operando Netflix en España, un certo malestar existe nas comunidades autónomas nas que existe unha segunda lingua oficial, xa que o servizo de vídeo baixo demanda só está a incluír audio e subtítulos en versión orixinal e español nos seus contidos, pese a que varias das producións dispoñibles emitíronse en televisións autonómicas, de xeito que estarían previamente dobrados. Isto levou a Anxo Núñez, inquedo creador da plataforma social en galego Lugher, a organizar unha recollida de sinaturas a través de Change.org para esixir que Netflix España engada a opción de versión en galego nos filmes que dispoñan da mesma.
Esta campaña incide no feito que durante os últimos trinta anos dobráronse ao galego numerosas series de televisión e filmes que actualmente non están dispoñibles na nosa lingua para o público, polo que a súa publicación en plataformas de vídeo baixo demanda facilitaría o seu acceso legal en galego, o que claramente contribuiría á normalización da nosa lingua.
Non estamos ante unha reclamación que chegue só dende Galicia, senón que dende Euskadi tamén están a promover unha campaña en Change.org na mesma liña, e en Cataluña o asunto chegou á propia Generalitat, concretamente á Dirección Xeral de Política Lingüística, que reprocha que Netflix incluso dobre contidos subtitulados en sueco, noruegués ou danés, linguas empregadas por menos falantes que o catalán.
Ao parecer, Netflix España si tería a intención de emitir series e películas en catalán, éuscaro e galego, pero non queren dar tal paso ata poder contar cos medios técnicos e humanos que lle permitan facelo coas tres linguas simultaneamente.