Ferrol amosou como sermos fortes no turismo botando man das TIC

O pasado venres (13 de novembro) Ferrol acollía unha nova actividade do foro Ferrol Turismo Marketing, organizado polo Concello en colaboración coa Deputación da Coruña. O obxectivo deste encontro (Videomarketing para a empresa turística) era o de mellorar a formación do sector turístico da cidade. Consistiu, máis en detalle, nun obradoiro de cara a optimizar o posicionamento en liña e a comercialización dos produtos/servizos das empresas a través do uso de tecnoloxías socio-dixitais combinadas con formatos audiovisuais.
Indo á práctica, o obradoiro formativo (que tivo lugar de 9:30 a 13:30 pola mañá e de 15:30 a 19:30 pola tarde, no Hotel Almirante) estaba encamiñado a profesionais e empresarios en activo dos eidos do Turismo e do Comercio amais de a emprendedores ou estudantes do xeodestino Rías Altas-Ferrolterra. O responsable de dirixir a actividade foi Tirso Maldonado, un experto consultor en Mercadotecnia e Tecnoloxías da Información e profesor do máster eTourism para a CETT (Universidade de Turismo de Barcelona) e do máster da Universidade Europea de Madrid. Sinalar que Maldonado é un relator habitual en foros de tecnoloxía e turismo e ten desenvolvido proxectos innovadores para entidades como o Cabildo da Palma, Andalucía Lab ou Andalucía Emprendo. Dende 2012 é o principal responsable da plataforma de formación en liña Witcamp, amais de socio director de Socialtec. Durante a xornada sobre videomarketing seleccionouse unha empresa das participantes para desenvolver os exercicios sobre ese caso real.
Por último, informar que alén do obradoiro do día 13 de novembro e dentro das actividades do foro Ferrol Turismo Marketing, este venres 20 de novembro (de 10 a 14 h e de 17 a 21 h) está prevista a celebración dun segundo encontro formativo que levará por título Lean Startup para negocios e unha terceira sesión para o sábado 21 de novembro titulada Plan de Comunicación emocional (de 10 a 14 h). Os ditos obradoiros estarán impartidos por Roberto Pérez Marijuán e Juan José Romero Crusat, fundadores da consultora estratéxica Suma Importancia, dende a que se colaborou en máis de 20 proxectos emprendedores nos últimos dous anos.