A Cámara de Santiago amosará nunha xornada como manter os nosos datos a salvo

A Cámara de Comercio de Santiago quere amosar en detalle recursos para que as nosas firmas fagan un uso máis correcto, axeitado e prudente das novas tecnoloxías. Por este motivo, celebrará o primeiro de decembro unha xornada de balde sobre a seguridade e protección de datos nas empresas, incluída dentro do programa de innovación Feira do Coñecemento. A actividade terá lugar no salón de actos da entidade a partir das 11:00 horas.
O obxecto da sesión será “informar aos responsables das empresas e ao público en xeral dos desafíos e as respostas axeitadas, por medio dos avances tecnolóxicos, en materia de seguridade de datos no contorno local e en Internet”.
A Cámara de Comercio, ampliando os obxectivos perseguidos coa actividade, considera “que as PEME galegas non dispoñen na actualidade de recursos para solucionar todas as vulnerabilidades dos seus sistemas e sofren a miúdo ameazas de seguridade tecnolóxica”. Segundo a entidade, co fin de acadar “unhas condicións óptimas de seguridade”, cómpre que as firmas da nosa terra se informen sobre a manchea de conceptos, posibles ataques e solucións tecnolóxicas existentes. Solucións como, por exemplo, a seguridade perimetral, os cortalumes de nova xeración, a protección de datos, a seguridade de aplicacións web, os antimalware, a detección de intrusións, a seguridade de correo, a prevención de fuga de datos, os xestores de logs de seguridade, a seguridade do posto de traballo, de acceso a Internet ou de mobilidade.
Na xornada contarase coa presenza (e experiencia) de empresas referentes en solucións de protección TIC, como Ednon, Dell Security, Imperva e Inter Security que presentarán servizos para acometer calquera situación de risco. O presidente da Cámara, Jesús Asorey, presentará a xornada e os cinco relatorios impartidos polo director técnico de Ednon, Ricardo Rodríguez; a especialista en vendas de seguridade de Dell Security, María García; o director rexional de vendas para España e Portugal de Imperva, Jesús Vega; o enxeñeiro de prevenda senior de Inter Security, Jonathan Rendal; e o xerente de desenvolvemento de negocio do sector industrial de Ednon, Luciano Novo.