Samsung presenta unha aplicación móbil que converte en música as cantaruxadas

Durante estes días Samsung acude ao festival South by Southwest, escenario que elixiron para presentar varios dos seus proxectos de investigación, entre os que resulta especialmente rechamante a aplicación móbil Hum On!, que permite converter en notas musicais a música que o usuario cantaruxe, realizando a transcrición da música a un pentagrama para a súa posterior reprodución (podendo elixir entre os estilos clásico, rock e R&B), e para que así tamén poida compartirse en redes sociais ou incluso aproveitar a música composta para empregar nas nosas creacións audiovisuais sen medo a infrinxir o copyright.
A aplicación analiza a voz do usuario, rexistrando o ton e a duración, para interpretala como música, transcribíndoa no pentagrama musical e permitindo incluso a súa edición, o que pode resultar de grande utilidade incluso para músicos profesionais, estudantes ou simples afeccionados, estando agora o proxecto centrado en mellorar a precisión do seu sistema de recoñecemento musical e colaborando con artistas para poder achegar un sistema de acompañamento musical cada vez máis diverso.

A maiores, Samsung tamén levou ao SXSW 2016 unha plataforma social para a creación de contido colaborativo chamada Waffle e un sistema de realidade virtual, Entrim 4D, que mediante uns auriculares especiais que tamén transmiten impulsos eléctricos buscan recrear a sensación de movemento e velocidade (engadindo realismo e reducindo os mareos que crean moitas veces as tecnoloxías inmersivas).