Just Eat comeza a repartir comida a domicilio mediante robots

Aínda que o reparto mediante drons estea a ser a aposta de moitas compañías de cara ao futuro, no Reino Unido a popular plataforma en liña de pedidos de comida a domicilio Just Eat está a innovar estreando un sistema de reparto mediante robots, no que aseguran que é o primeiro sistema deste tipo a nivel mundial.
No mes de xullo Just Eat pechou un acordo con Starship Technologies para desenvolver esta solución que leva 5 meses en probas, e que por fin entrou en fase comercial, cun primeiro cliente en recibir o seu pedido de comida a través dun robot automatizado. Este servizo de entrega está a probarse en Greenwich, e prevese o seu espallamento polo resto de Londres durante o ano que vén, aspirando a ter unha completa frota de robots ao longo de múltiples barrios británicos.
O primeiro pedido entregado por un robot de Just Eat foi o realizado por unha moza chamada Simone ao restaurante turco Taksim Meze. No momento no que se realizou o pedido en liña o robot de reparto desprazouse cara ao restaurante administrado pro Ana Maria Stingaciu, para que ao prepararse a comida fose introducida nun compartimento do robot, que púxose en ruta para chegar onde a cliente en 8 minutos. Simone recibiu unha mensaxe de texto indicándolle que tiña o seu pedido na porta, incluíndo unha ligazón que permite abrir a porta do compartimento para recoller a encarga que esperaba diante do seu domicilio. A cliente recoñeceu quedar abraiada co servizo e comentou ao respecto que «a única cousa da que non estaba segura e de se tiña ou non que deixar propina».
Neste programa piloto de Just Eat participan polo momento 10 restaurantes para que os residentes de Greenwich poidan gozar deste revolucionario sistema de reparto.