Os monitores LG UltraFine 5K fallan preto de routers

Coa presentación dos novos MacBook Pro chegaron tamén os monitores UltraFine 5K de 27 polgadas, deixando claro que Apple saía do mercado dos monitores e apostaba por asociarse a LG para ofrecer boas pantallas externas para os seus equipos, pero estes monitores cunha resolución de 5.120 x 2.880 píxeles están a presentar serios problemas para moitos usuarios que farían que a pantalla fose practicamente inservible, indo dende pestanexos en pantalla ata desconexións e bloqueos que chegaban incluso a colgar o MacBook Pro ao que estaban conectados e finalmente descubriron que o que a primeira vista podería parecer unha unidade defectuosa trátase realmente dun fallo de funcionamento cando a pantalla está a unha distancia inferior a 2 metros dun router.
Estamos ante un fallo de deseño moi grave, que non acontece con ningún outro monitor de LG (lembremos que estas pantalla 5K desenvolvéronse en colaboración con Apple) e mentres non aparece unha solución recoméndase aos potenciais compradores dun monitor que custa 1.049 euros que teñan en conta este defecto antes de decidir a compra do dispositivo, xa que non sempre poder resultar posible manter o posto informático afastado de routers.