Visual Studio 2017 permite desenvolver aplicacións para Windows, iOS e Android

A ferramenta de desenvolvemento de software Visual Studio está a celebrar o seu 20º aniversario, o que aproveitou Microsoft para presentar o Visual Studio 2017, nova versión que presenta grandes novidades como a súa dispoñibilidade para macOS, así como a posibilidade de que os equipos de desenvolvemento poidan empregar esta ferramenta para crear aplicacións nativas para Windows, iOS e Android, sen sacrificar a produtividade nin retrasar o lanzamento das mesmas.
Deste xeito os profesionais terán maiores posibilidades para o desenvolvemento de aplicacións multiplataforma grazas á reutilización de código a través de plataformas de dispositivos evitando ter que multiplicar o tempo e o esforzo en xerar unha aplicación para cada un dos sistemas operativos.
Visual Studio 2017 tamén inclúe ferramentas avanzadas de calidade específicas para móbiles que permiten aos desenvolvedores axustar e probar facilmente as aplicacións a móbiles en tempo real e garantir que a experiencia dos usuarios sexa da máis elevada calidade, independentemente do dispositivo ou a plataforma na que se utilice.
Esta actualización da ferramenta de desenvolvemento de Microsoft supón así unha importante axuda para acurtar os ciclos de creación para que os desenvolvedores poidan ofrecer un mellor software con maior frecuencia, facilitando tamén ferramentas avanzadas para monitorizar e depurar o software para identificar e solucionar problemas e erros a grande velocidade.