A Deputación de Lugo inxectará 4 millóns de euros na dixitalización das administracións locais

A Deputación de Lugo aprobou este venres 23 de xuño un convenio tipo para implicar aos concellos nas iniciativas de dixitalización da administración local que se realizarán en datas vindeiras, ao abeiro dos fondos europeos que vén de captar a institución provincial para tal fin. Estes fondos ascenden a 4 millóns de euros. Así o anunciou a voceira socialista en funcións do Goberno, Pilar García Porto, quen detallou os acordos adoptados na reunión desta semana.
“Dende a Deputación temos feita unha análise inicial sobre cales son as liñas sobre as que traballar, pero queremos que os propios concellos manifesten as súas prioridades máis inmediatas en materia de dixitalización”, detallou a deputada. Para iso, explicou que se desprazará persoal técnico aos diferentes municipios para coñecer da súa man o punto de partida que hai en cada un deles para logo poder darlle resposta cos fondos que cheguen, “que serán repartidos dun xeito moi semellante a como o facemos co Plan Único, é dicir, en base a criterios obxectivos”, concretou García Porto.
Nas súas palabras explicou que esta maneira de traballar servirá para “ser máis eficientes á hora de executar os recursos europeos con vistas a lograr que os nosos concellos estean á vangarda tecnolóxica”.
No marco deste proxecto, desenvolveranse, entre outras, actuacións para integrar a Administración Electrónica dos concellos cos servizos da Administración Xeral do Estado, implantar postos de traballo intelixentes que permitan mellorar a resiliencia dos municipios, crear oficinas de asistencia en materia de rexistro, implantar un sistema de gravación nos plenos dos concellos da provincia, ou mellorar a accesibilidade das páxinas webs municipais, aumentando así a transparencia dos concellos.