A Deputación de Lugo premia o emprendemento innovador no rural
xoves, 15 de novembro do 2018
A
Deputación de Lugo vai premiar novas iniciativas empresariais do
rural cun total de cinco galardóns. Os recoñecementos, que foron
presentados hoxe pola deputada de Promoción Económica e Social,
Sonsoles López Izquierdo, veñen cunha contía de 50.000 euros. O
obxectivo, segundo informou, é fomentar o espírito innovador e
emprendedor na provincia. Para quen queira máis datos sobre o
certame, a
Deputación de Lugo habilitou na súa web todo tipo de información
detallada.
López
Izquierdo explicou que a iniciativa abrolla do compromiso da
Deputación coas contornas non urbanas, poñendo en xogo cinco apoios
para outros tantos proxectos de emprendemento. “Dende o Executivo
provincial apostamos polo medio rural coma un medio de oportunidades
no que se poden desenvolver iniciativas laborais e empresariais
relevantes para a economía e o desenvolvemento da nosa provincia, e
os premios que hoxe presentamos son unha mostra máis desta firme
convicción”, sinalou a deputada, engadindo que outro dos
obxectivos de propostas como a presentada hoxe é “fixar poboación
nas aldeas e nas vilas”.
Logo
da publicación das bases este martes no Boletín Oficial da
Provincia, mañá ábrese o prazo para que todas as persoas
interesadas en participar poidan rexistrar as súas solicitudes ata o
vindeiro día 29 de novembro, incluído. A previsión é que a finais
de ano se coñezan os beneficiarios. As solicitudes presentaranse de
maneira telemática na sede electrónica da Deputación:
http://sede.deputacionlugo.org.
Toda a información e documentación necesaria pode atoparse, como
dixemos, na páxina web
http://deputacionlugo.gal/gl/temas/emprego/emprendendo_rural.
Nas
bases estipúlase que no certame pode participar calquera cidadán,
as únicas esixencias serán non estar constituídos como empresa (a
intención é premiar a idea en si mesma e darlle azos para
converterse en realidade de mercado), a obriga de constituírse antes
de 31 de agosto de 2019, afincarse no rural e manter a actividade
durante polo menos dous anos.