A Deputación de Pontevedra forma en eAdministración os novos gobernos locais da provincia
martes, 5 de novembro do 2019
A
Deputación
de Pontevedra vai formar en Administración Electrónica aos novos
gobernos da provincia. E farao a partir da semana que vén,
concretamente nos concellos de Cambados, Ponte Caldelas, Tomiño,
Baiona, Meaño, Vila de Cruces, A Cañiza e Poio. O obxectivo desta
nova programación é mostrar as principais funcionalidades e cambios
máis relevantes da plataforma de Gestiona da institución
provincial, co fin de “dar resposta a cada un dos cumprimentos
marcados pola Lei 39/2015 e a Lei 40/2015”.
En
concreto, esta vindeira semana terán lugar oito accións formativas
en oito concellos da provincia. Deste xeito, o luns 4 de novembro as
xornadas terán lugar en Cambados e Ponte Caldelas; o martes 5 será
a quenda de Tomiño, Baiona, e Meaño; o mércores 6 chegarán a Vila
de Cruces; A Cañiza recibirá a formación o xoves 7; e, por último,
o venres 8 realizarase a acción formativa en Poio.
A
través das sesións formativas a institución vai dotar de
ferramentas e de información sobre eAdministración aos novos
equipos de goberno, dándolles a coñecer os diferentes libros de
rexistro de entrada e saída, a utilización do xestor de
expedientes, o acceso ás convocatorias na aplicación de órganos
colexiados, como activar as sinaturas electrónicas na nube e no
móbil, como consultar o rexistro e expedientes, como visualizar os
libros de actas e como consultar experiencias e presentar mocións e
preguntas.
En
total, este novo plan de formación vai beneficiar a 53 concellos da
provincia adheridos ao proxecto de goberno dixital. No que respecta
aos 23 concellos de menos de 5.000 habitantes, as accións formativas
terán lugar nas dependencias da Deputación os días 27, 28 e 29 de
novembro.