A Industria 4.0 impulsa as capacidades de reciclaxe de SOGAMA
venres, 24 de maio do 2019
SOGAMA,
a Sociedade Galega de Medio Ambiente, presentou os días pasados (con
motivo do Día Internacional da Reciclaxe, 17 de maio) datos
relevantes sobre a súa evolución tecnolóxica e as vantaxes
acadadas, en materia de reciclaxe e produción, pola adopción no
seu seo da Industria 4.0 (un novo xeito de producir máis eficiente,
automatizado, sustentábel e intelixente). Os datos, que foron
acompañados dunha nova proclama a adoptarmos o principio dos tres
erres (Reducir, Reutilizar e Reciclar, tres pasos para contribuír ao
desenvolvemento sustentábel), certifican a capacidade de SOGAMA para
aumentar o abano de materiais que acadan reciclaxe.
Así,
grazas á implantación dos sistemas propios da Industria 4.0 na
planta de recuperación de refugallos contidos no lixo convencional,
a compañía xa conseguiu recuperar até 11 tipoloxías de materiais
(que se entregan aos centros recicladores para que sexan convertidos
en novos recursos e reincorporados ao circuíto comercial cunha nova
vida). SOGAMA tamén fixo saber que coa entrada en funcionamento
desta instalación, que conformou a primeira fase da ampliación do
complexo medioambiental de Cerceda, a compañía pública
“multiplicará por catro a súa contribución á reciclaxe e
chegará en 2020 ao vertido técnico cero (10%)”, esixencia imposta
polo Parlamento Europeo para todos os Estados membros no horizonte do
ano 2035. A Sociedade Galega do Medio Ambiente mostrou o seu
convencemento nas vantaxes da innovación tecnolóxica: grazas á
fórmula e a colaboración cidadá, “facilítase o camiño cara á
economía circular na nosa Comunidade”, engade a entidade.