A Intelixencia Artificial será unha das temáticas estrela do segundo Ciclo Aida Fernández Ríos
xoves, 25 de novembro do 2021
A
investigación científico-tecnolóxica segue a ser protagonista na
nosa terra neste cambio de mes, co engadido extra de facelo en
diferentes emprazamentos da xeografía galega, concretamente da
provincia de Pontevedra. Este obxectivo de seguir levando o
coñecemento avanzado o máis preto posíbel da sociedade é
o alicerce do Ciclo de Conferencias Aida Fernández Ríos, cuxa
segunda edición reiníciase a partir do 29 de novembro.
- Amparo Alonso nunha imaxe de Xurxo Lobato
Unha das
cuestións sobre as que se vai falar será a Intelixencia Artificial,
poñendo o foco nas posibilidades que ofrece xa, no presente actual.
Esta será a temática da charla de Amparo Alonso, investigadora do
CITIC.
O
ciclo vén da man da Real Academia Galega de Ciencias (RAGC) e a
Deputación de Pontevedra, contando coa catedrática de Microbioloxía
da Universidade de Santiago de Compostela (USC) e vicepresidenta da
RAGC, Alicia Estévez Toranzo, en labores de coordinación.
Celebraranse cinco conferencias presenciais en institutos de
secundaria e bacharelato de Tui, Bueu, O Grove e Silleda.
Estas
charlas teñen como finalidade “achegar a ciencia á poboación
máis nova e fomentar as vocacións científicas, así como
concienciar ao alumnado de que nenos e nenas teñen as mesmas
capacidades e poden chegar a ser o que se propoñan”.
As
charlas estarán impartidas por mulleres das tres universidades
galegas.
- Sabela Balboa
A
primeira charla celebrarase o luns, 29 de novembro, no IES Indalecio
Pérez Tizón de Tui, ás 16:30 horas. Un grupo de 25 alumnas e
alumnos da rama científica, tecnolóxica e biosanitaria de 1º de
bacharelato asistirán á conferencia sobre bacterias comeplásticos
que impartirá a profesora e investigadora distinguida no Centro
Singular de investigación en Tecnoloxías Ambientais (CRETUS) da
USC, Sabela Balboa Méndez.
Segundo
explica a investigadora, as bacterias viven en todos os ambientes
coñecidos, “desde o polo ata o deserto e en cada ambiente
evolucionan para ser capaces de alimentarse das substancias que
atopan”. Destaca que cada ano “xeramos máis de 12 toneladas de
plásticos que acaban no mar, moitos deles invisibles, os chamados
microplásticos, partículas de plástico minúsculas que proceden da
rotura doutros plásticos ou dalgúns produtos que se usan a diario
como a pasta de dentes. “Hai bacterias que son capaces de vivir
sobre os plásticos e comelos, e por tanto degradalos”.
O
xoves 9 de decembro celebrarase unha nova charla no IES illa de Ons
de Bueu, ás 11:55 horas. Nela participarán 32 alumnas e alumnos de
4º da ESO que asistirán a un relatorio titulado A Intelixencia
Artificial non é ciencia ficción, impartido pola
catedrática da Área de Computación e Intelixencia Artificial da
Universidade da Coruña e presidenta da Asociación Española de
Intelixencia Artificial (AEPIA), Amparo Alonso Betanzos, que é
tamén investigadora do CITIC da UDC. A relatora destaca que na
charla explicará que é a Intelixencia Artificial, cales son os seus
usos e as súas metas, tecnoloxía presente practicamente en calquera
eido de investigación, e tamén cales son algúns dos problemas
abertos e as limitacións actuais. “A tecnoloxía é cada vez máis
interdisciplinar, e a Intelixencia Artificial necesita para o seu
desenvolvemento non só enxeñeiros e científicos, senón tamén
profesionais das áreas de humanidades, para que todos podamos
contribuír ao desenvolvemento dunha Intelixencia Artificial que sexa
boa para as persoas”. Ademais, a catedrática asegura que esta
tecnoloxía está a cambiar o emprego, a educación e a forma que as
persoas teñen de relacionarse na sociedade, polo que na conferencia
expoñerá algunhas ideas para poder enfrontar un futuro cambiante e
apaixonante.
- Isabel Medina
Obxectivo
saúde: a revolución dos alimentos é o título da conferencia
que impartirá a profesora de investigación do Instituto de
Investigacións Mariñas (IIM) de Vigo do Consello Superior de
Investigacións Científicas (CSIC), coordinadora Nacional da Área
de Ciencia e tecnoloxía dos Alimentos do CSIC e académica numeraria
da RAGC, Isabel Medina Méndez, o venres, 10 de decembro, no
IES Monte da Vila do Grove ás 11:35 horas. Un grupo de alumnas e
alumnos de 1º e 2º de bacharelato do centro asistirán á charla. A
historia da humanidade está unida á historia dos alimentos. Medina
explica que as eleccións alimentarias, xunto cos cambios climáticos,
provocaron importantes variacións –a nivel anatómico e
fisiolóxico–no organismo dos seres humanos. En concreto, destaca
que a abundancia de peixe e algas nas zonas costeiras axudou ao
desenvolvemento da capacidade cerebral nos homínidos, grazas aos
seus ácidos graxos omega-3, compoñentes do cerebro e fundamentais
para a saúde humana, xa que “o peixe forma parte da nosa
gastronomía e cultura”.
- Elena Vázquez
A
decana da Facultade de Matemáticas e profesora de Matemática
Aplicada da USC, Elena Vázquez Cendón, será a encargada de
impartir a charla titulada As matemáticas que pesquei na ría de
Pontevedra. A conferencia celebrarase o luns, 13 de decembro, ás
9:40 horas no IES Pintor Colmeiro de Silleda. Asistirán un grupo de
42 alumnas e alumnos de 1º de bacharelato. O obxecto desta charla é
compartir co alumnado matemáticas próximas. A motivación da
investigación de Elena Vázquez nace de coñecer as mareas na ría
de Pontevedra. Compartirá cos alumnos a colleita matemática que
aprendeu e que serviu para aplicar a outras partes do planeta,
acuñando o lema Matemáticas
para un mundo mellor do proxecto Marzo, mes das matemáticas.
- África González
A catedrática de Inmunoloxía do Centro de Investigacións Biomédicas (CINBIO) da Universidade de Vigo (UVigo), África González Fernández, impartirá o luns, 20 de novembro, a conferencia Potencia as túas defensas: Vacínate! no IES Johan Carballeira de Bueu ao que asistirán alumnas e alumnos de 4º da ESO e 1º e 2º de bacharelato. Segundo sinala África González, a vacinación é a medida preventiva máis eficaz, que prevé doenzas, secuelas e mortes. A charla describirá que é a vacinación, que pretende facer e os pasos necesarios para desenvolver vacinas eficaces contra un patóxeno, como o SARS-CoV-2.