A RAGC organiza un ciclo de conferencias sobre IA en Compostela, A Coruña e Ferrol

Senén Barro será un dos participantes no ciclo de conferencias da RAGC

A vindeira semana, do 23 ao 26 de outubro das 17 ás 20:30 horas, a Real Academia Galega de Ciencias (RAGC), en colaboración coa Deputación da Coruña, celebrará un ciclo de conferencias tituladas: Intelixencia Artificial. A electricidade do século XXI? As charlas poderán seguirse vía streaming previa inscrición.
Indo ao ciclo en cuestión, dicir que está coordinado polo catedrático de Ciencias da Computación e Intelixencia Artificial (IA) Senén Barro, académico da RAGC e director do Centro Singular de Investigación en Tecnoloxías Intelixentes da Universidade de Santiago (CiTIUS). Senén lembra que Andrew Ng (profesor na Universidade de Stanford e un dos maiores expertos en aprendizaxe automática) comentou que “do mesmo xeito que a electricidade transformou case todo hai un século, hoxe en día fáiseme difícil imaxinar unha industria que non sexa transformada pola IA nos vindeiros anos”. “Neste sentido, considera a IA como a electricidade do noso século. Aínda que esta é unha frase esaxerada, non cabe dúbida de que vai camiño de ser unha das tecnoloxías máis transformadoras da economía e da sociedade, senón a que máis”, segundo Barro. Atendendo a esta transcendencia, Barro di que cómpre abordar aspectos da IA como o estado da investigación e o desenvolvemento no que se atopa; o impacto nalgúns dos temas que nos resultan máis sensibles como a educación, a saúde ou o emprego, neste caso claramente afectado pola automatización intelixente; a transformación e innovación intelixentes na industria; e a denominada IA fiable, pola que aposta a UE, e España moi especialmente, como se puxo de manifesto recentemente coa creación da Agencia Estatal de Supervisión de la IA (AESIA)”. Todos estes temas trataranse nestas xornadas por parte dun grupo de expertos, en particular investigadores, profesores, empresas e institucións do eido galego, nacional e europeo.
O ciclo diríxese a todo o público interesado na Intelixencia Artificial e no seu impacto social, económico, ético, laboral..., sen necesidade de que sexa especialista neste eido. Buscarase ademais a participación activa dos asistentes durante as diferentes sesións, en particular durante o debate que pechará cada xornada.
As dúas primeiras sesións celebraranse os días 23 e 24 de outubro en Santiago de Compostela, na sede da Confederación de Empresarios de Galicia (Rúa do Vilar). O día 25 o ciclo trasladarase ao salón de actos do Campus de Ferrol. E pecharase o 26 no Kiosko Alfonso da Coruña.
O prazo de inscrición para participar de xeito gratuíto en todas as conferencias, de xeito presencial ou en liña, xa está aberto e cómpre visitar o formulario en liña habilitado para participar.