A UVigo achega un cinefórum para combater as desigualdades STEAM
xoves, 8 de abril do 2021
A
Escola de Enxeñaría de Minas e Enerxía da UVigo quere impulsar e
dar visibilidade á muller nos ámbitos STEAM (Ciencias, Tecnoloxía,
Enxeñaría, Arte e Matemáticas). Por esta razón, botou man da
fórmula do cinefórum para espertar, en palabras de Teresa Rivas,
docente e investigadora da escola, “o espírito crítico no
alumnado e empoderar ás estudantes que cursan disciplinas
tecnolóxicas”. A
actividade (In)visibilidade das mulleres STEAM na cinematografía,
impulsada por Rivas, conta co patrocinio da Unidade de Igualdade.
O
ciclo arrancará este 8 de abril a partir das 16.30 horas coa
proxección no salón de actos da Escola de Enxeñaría de
Telecomunicación do documental Mercury 13, centrado no
programa secreto deseñado para levar ao espazo á primeira muller
astronauta e que foi abortado pola NASA.
O 22
de abril o público poderá asistir á proxección da película
Hidden figures, que narra a historia das tres primeiras
mulleres afroamericanas en acadar grandes metas no seo da NASA.
O
segundo dos documentais do ciclo chegará o 5 de maio, Bombshell,
no que a actriz e inventora Hedy Lamarr narra as súas vivencias,
entre as que se inclúen o desenvolvemento das bases do sonar, o GPS,
a tecnoloxía Wi-Fi ou o bluetooth. O ciclo chegará ao seu
fin o 19 de maio coa proxección de A muller e a montaña, a
historia dunha muller islandesa que rexeita o apoio dos gobernos a
megaproxectos que non respectan o medio ambiente e sobreexplotan os
recursos.
Mulleres
protagonistas
“En
todos os casos, as mulleres son protagonistas activas en ámbitos
relacionados coa tecnoloxía. No caso dos documentais, o nesgo e a
discriminación son denunciados de maneira explícita, permitíndonos
descubrir as dificultades das protagonistas en reclamar o sitio que
lexitimamente (pola súa formación e capacitación) lles corresponde
e así descubrir a concepción androcentrista da realidade que
describen” explica Teresa Rivas, que en relación coas películas
que se proxectarán sinala que o obxectivo non é só dar
visibilidade á contribución das protagonistas ao ámbito da
tecnoloxía, “senón tamén mostrar diferentes miradas femininas
ante os restos que se lles presentan”.
As
proxeccións, nas que participará como moderador o experto docente
en cine Alfonso Castaño, están especialmente dirixidas ao alumando
das escolas de enxeñaría da UVigo, que deberá preinscribirse ata
as 13.00 horas do mesmo día da emisión.