A UVigo impulsa unha manchea de proxectos TIC con amplo potencial para revolucionar o mercado
xoves, 20 de xaneiro do 2022
A
Universidade de Vigo fixo balance do acadado pola institución para
converter en realidades palpábeis proxectos tecnolóxicos e
científicos con potencial de seren trasladados ao mercado e ás
empresas. Segundo fixo saber, foi
quen de captar no ano que vimos de despedir 1,5 millóns de euros
para desenvolver 10 proxectos proba-conceptos encadrados nos ámbitos
das TIC (Tecnoloxías da Información e a Comunicación), a saúde, a
cosmética e o medio ambiente. Na listaxe inclúese unha
destacada iniciativa da que falamos neste medio: Celia,
que se dirixe a crear un asistente interactivo orientado a mellorar
a comunicación das persoas con demencia.
Todos
estes proxectos foron postos en macha e “por diante teñen dous
anos nos que demostrar que a I+D+i que se realiza nos laboratorios
universitarios pode ser trasladada ao tecido socio-produtivo en forma
de produtos, bens, servizos ou calquera outra aplicación que sexa
beneficiosa para a economía, a sociedade, a cultura ou as políticas
públicas”, sinalou a Uvigo, especificando que 681.000 euros
conseguíronse a través da convocatoria Probas de Concepto do
Ministerio de Ciencia e Innovación, un programa de nova convocatoria
financiado con fondos Next Generation EU, e 746.000 proveñen do
programa Ignicia-Proba de concepto, unha iniciativa pioneira posta en
marcha pola Xunta de Galicia a través da Axencia Galega de
Innovación (GAIN) en 2016 e que xa leva tres edicións.
Convocatoria Probas de Concepto
O
proxecto que acadou un maior financiamento, 149.500 euros, é
O3-Integap, Tecnoloxía de inxección de ozono para
purificación de gases de escape. Neste caso, pártese dun
traballo anterior no que se comprobou o importante potencial da
técnica de inxección de ozono como sistema de purificación dos
gases de escape e mecanismos de eliminación de fouling, e o
obxectivo é estender esta técnica para contribuír á redución das
emisións de gases de efecto invernadoiro derivadas da combustión
dos próximos biocombustíbeis e do resto de combustíbeis fósiles.
Relacionado
tamén co medio ambiente o proxecto Hibritec+,
financiado con 138.000 euros, busca un enfoque práctico e próximo á
realidade de mercado na detección e o tratamento de compostos
farmacéuticos.
Entre
os proxectos que contan cunha maior cantidade de financiamento, preto
de 100.000 euros, atópase tamén NanoInRe, que busca
xerar nanofluídos optimizados para intercambiadores de calor nunha
planta piloto de enerxía xeotérmica.
Dirixido
especificamente ao ámbito sanitario, PolyDeepAdvance,
cun orzamento de 75.000 euros, realizará a validación clínica e o
plan de acceso ao mercado dun sistema de diagnóstico asistido por
ordenador baseado no Deep Learning (técnicas de aprendizaxe
profunda) para a detección e clasificación de lesións colorrectais
en tempo real.
No
ámbito das tecnoloxías TIC, VAIMos, financiado con
72.500 euros, busca valorizar os resultados do proxecto AIM sobre
Internet de Todo (Internet of Everything, IoE); Realsat,
cun orzamento de 40.000 euros, diríxese a procurar unha nova
tecnoloxía, efectiva en custo, para mellorar a cobertura desde
satélites xeoestacionarios pequenos (GEO) ou de órbita baixa (LEO);
e, cun financiamento de 43.000 euros, FLATCity-Urban
formula a necesidade de estender os algoritmos de caracterización de
elementos do solo co fin de extraer outros atributos que enriquezan o
mapa de navegación como son a anchura dos elementos ou o estado de
conservación.
Da
unión entre o mundo das TIC e a comunicación xurde DEBATrue,
un proxecto ao que o ministerio lle concedeu 65.000 euros,
financiamento co que tentar pór en marcha unha plataforma de
verificación e comprobación en liña sobre as afirmacións
realizadas polos candidatos ou candidatas durante e despois da
celebración dos debates electorais, contribuíndo así ao
desenvolvemento dun modelo de medios de comunicación máis
innovadores e democráticos.
Ignicia: 388.000 para o proxecto Celia e 358.000 para Surfacorn
No
caso da convocatoria Ignicia impulsada pola Xunta de Galicia a
subvención é de 746.000 euros: 388.000 para Celia, un
asistente interactivo orientado a mellorar a comunicación das
persoas con demencia, e 358.000 para Surfacorn,
traballo que busca aplicar o extracto biosurfactante obtido dos
licores do lavado do millo para usos cosméticos e farmacéuticos.
No
caso de Celia, proxecto que foi presentado o pasado mes de novembro
nun acto celebrado no edificio Redeiras, permitirá que persoas con
demencia en estados iniciais vexan retardado o seu deterioro
cognitivo, utilizando unha tableta que lles ofrecerá contidos de
estimulación personalizados, baseados en noticias, a partir das que
se lle realizarán preguntas sobre esta información, pero tamén
sobre a súa vida. O obxectivo é que a ferramenta permita que
persoas maiores con deterioro cognitivo leve obteñan de xeito áxil
e sinxelo información do seu interese, que se lles presenta en
linguaxe natural. Para conseguilo bótase man de diferentes
tecnoloxías: chatbots ou aplicacións informáticas baseadas
na Intelixencia Artificial que permiten simular a conversa cunha
persoa; análise de sentimento; algoritmos de Machine
Learning (aprendizaxe das máquinas); xeración de
linguaxe natural… todo baixo “unha aplicación Android amigábel”.