A aplicación móbil galega Imos? destaca en vendas na App Store

xoves, 11 de outubro do 2012 Marcus Fernández
JPEG - 162.5 KB
Imos? figura actualmente no posto 6 das aplicacións de pagamento na App Store

No verán o estudo de desenvolvemento de aplicacións móbiles GalApps estreou a apliación Imos? para iPhone e iPod Touch, estreándose no modelo de negocio do pagamento (pois as súas anteriores aplicacións eran de balde, e esta guía da gastronomía e enoloxía galegas que é coñecida popularmente como a app dos furanchos está a sorprender pola súa boa aceptación, pois pese a estar destinada a un público galego vén de colocarse no 6º posto das aplicacións de pagamento na tenda de descargas de Apple, despois de grandes éxitos como WhatsApp, Bad Piggies (o novo xogo dos creadores de Angry Birds) ou o propio FIFA 13 e, evidentemente, liderando a categoría de Comida y bebidas da App Store.
Estamos ante todo un éxito sen precedentes en aplicacións móbiles de pagamento galegas, moi difícil de replicar agás que esteamos ante ferramentas orientada a un público máis amplo. Lembremos que Imos? é unha guía social de enoloxía, gastronomía e tempo de lecer de Galicia na que figuran centos de furanchos, tabernas, sitios de tapas, casas de comidas onde poder gozar dun bo viño da casa e degustar comida da Terra ao longo de toda a xeografía galega.
<em>Imos?</em> estreou hoxe versión para iOSImos? tamén facilítanos a localización de 900 praias galegas e os puntos de información turística da nosa comunidade, que vai máis aló das plataformas tradicionais ao ligarse a Facebook e Twitter, facilitando compartir cos nosos amigos e seguidores os establecementos que descubramos a través desta aplicación móbil.
Os locais listados en Imos? inclúen información detallada sobre a súa localización e fotografías subidas polos demais usuarios, dos que tamén podemos consultar as súas valoracións e publicar as nosas propias. Dende GalApps tamén animan aos usuarios a engadir sitios que estean fóra de Galicia, pero que sirvan comida tradicional galega ou viño caseiro.
A aplicación está dispoñible en galego, español e inglés, e tamén integra o TradutorGalego.

JPEG - 138.3 KB
Imos? lidera actualmente a sección de Comida y bebidas da App Store

PUBLICIDADE