GalApps estrea unha guía social móbil de gastronomía e enoloxía galegas

Os establecementos listados en Imos? poden recibir valoracións por parte dos usuarios

Tras a boa acollida das aplicacións de balde de GalApps (ConxuGalego, DicionarioGalego e TradutorGalego) para Android e iOS, que acumulan máis de 15.000 descargas, estes desenvolvedores galegos atrévense a lanzar unha aplicación de pagamento, Imos?, que inicialmente está dispoñible para iPhone e iPod Touch por un prezo de 0,79 euros, agardándose que en breve conte tamén cunha versión para Android.
Esta nova ferramenta móbil é unha guía social de enoloxía, gastronomía e tempo de lecer de Galicia na que figuran centos de furanchos, tabernas, sitios de tapas, casas de comidas onde poder gozar dun bo viño da casa e degustar comida da Terra ao longo de toda a xeografía galega.
Imos? tamén facilítanos a localización de 900 praias galegas e os puntos de información turística da nosa comunidade, que vai máis aló das plataformas tradicionais ao ligarse a Facebook e Twitter, facilitando compartir cos nosos amigos e seguidores os establecementos que descubramos a través desta aplicación móbil.
Os locais listados en Imos? inclúen información detallada sobre a súa localización e fotografías subidas polos demais usuarios, dos que tamén podemos consultar as súas valoracións e publicar as nosas propias. Dende GalApps tamén animan aos usuarios a engadir sitios que estean fóra de Galicia, pero que sirvan comida tradicional galega ou viño caseiro.
A aplicación está dispoñible en galego, español e inglés, e tamén integra o TradutorGalego.