A empresa galega Unayta realiza a organización e descrición de 66 concellos de Castela

A compañía Unayta, con sede en Ames, foi elixida pola Deputación de Valladolid para levar a cabo un proceso de catalogación, organización e descrición dun total de 66 concellos da provincia, conseguindo mellorar así a súa eficiencia nas consultas. O traballo consistirá na execución, ao longo de varios meses, de exhaustivos procesos de recollida documental nas diversas dependencias e arquivos destes municipios, seguido dun proceso de limpeza, identificación e clasificación destes.
Fontes de Unayta lembran que non se trata dun desafío novo para o equipo profesional da empresa, que ten unha ampla experiencia en procesos semellantes en Galicia, traballos que lle serviron (como tamén lle servirá o proxecto de Valladolid) para mostrar as enormes vantaxes que ten o dispoñer dun arquivo municipal correctamente organizado (permitindo ás administracións locais, unha vez finalizado cadanseus proxectos, acceder á información que necesiten de forma áxil e sinxela, reducindo enormemente os tempos de procura).
Estes procesos, engade Unayta, posibilitan tamén sentar as bases necesarias para que estes concellos estean preparados para dar o seguinte paso na súa transición cara a un modelo de comunicación e interacción libre de papeis, abrindo a porta para implementar solucións dixitais máis complexas como un xestor documental, que permita acceder a todos os documentos directamente desde a nube, ou un arquivo dixital, que poña en valor todo o patrimonio cultural-histórico do concello nunha plataforma online á que poida acceder todo o mundo.
Con máis de dez anos de vida, Unayta é unha empresa de consultoría especializada en proxectos de transformación dixital e oficina sen papel. O seu persoal está integrado por un equipo de profesionais novos de alto nivel, expertos en eidos de actuación como a análise de datos, a consultoría ou a mercadotecnia dixital. A compañía conta entre os seus clientes con grandes empresas nacionais de sectores como a loxística ou o sector alimentario, aos que axudou nos seus respectivos procesos de transformación dixital.