A nova edición da gala aRi[t]mar concederá o premio especial a Ponte... nas ondas!

luns, 12 de decembro do 2022 S. P.

Este luns 12 de decembro presentáronse os detalles da gala aRi[t]mar de música e poesía galego-portuguesas, que chega á súa sétima edición este xoves 15 no Teatro Principal de Santiago xuntando unha parte das persoas e entidades recoñecidas nesta convocatoria. Na presentación, celebrada no Centro Internacional de Prensa de Galicia, participaron os representantes das entidades impulsoras do certame: o Concello de Santiago, a Deputación da Coruña, o Agrupamento de Cooperación Transfronteriza Galiza-Norte de Portugal e a Escola Oficial de Idiomas de Santiago. Tamén interveu Valentín García, responsábel da Secretaría Xeral de Política Lingüística, institución autonómica colaboradora de aRi[t]mar.
García destacou un ano máis a “importancia de aRi[t]mar como festival de actualidade para a música e poesía galegas e portuguesas, o que atrae a moita mocidade”. Ademais, quixo facer unha “mención especial este ano para o colectivo Ponte... nas ondas!”, que xusto acaba de ser recoñecido pola UNESCO no Rexistro de Boas Prácticas.
Na cerimonia, que chega á súa sétima edición, as poetas Lúa Mosquetera e Wilma Vieira recollerán os seus galardóns por teren producido o mellor da poesía en Galicia e Portugal durante este ano polas súas pezas Anorak de pel de Caribú e E se eu fosse eu?, respectivamente. Pola súa parte, a fadista Ana Moura e o cantante galego Xisco Feijóo, son os gañadores no apartado musical polos temas Andorinhas e Peixe.
O proxecto cultural Ponte... nas ondas! recibirá, pola súa banda, o premio especial do xurado á embaixada da amizade galego-lusófona polo seu “quefacer a prol do achegamento entre as culturas das dúas beiras do Miño”.
A gala estará conducida por dúas facianas coñecidas do mundo do espectáculo: Fran Rei e Isabel Risco. Ademais, contará coas actuacións en directo da artista setubalense A garota não e da galega Catuxa Salom, mentres que Mosquetera e Vieira porán a nota poética ao evento.
As persoas interesadas en asistir poderán recoller de balde as entradas a partir de mañá ás 11,00 h na web de Compostela Cultura. Tamén poderán retirarse no despacho de billetes da Zona C. Punto de Información Cultural (rúa do Preguntoiro, 1) e do Teatro Principal, aberto este último o mesmo día do evento ata unha hora antes do comezo do mesmo
aRi[t]mar galiza e portugal é un proxecto didáctico-cultural, desenvolvido inicialmente pola Escola Oficial de Idiomas de Santiago de Compostela, dependente da Consellería de Cultura, Educación, FP e Universidades da Xunta de Galicia. Ten por obxectivo divulgar a música e a poesía galego-portuguesas actuais e achegármonos á súa cultura e á súa lingua, no marco do desenvolvemento da Lei Valentín Paz-Andrade para o aproveitamento do ensino do portugués e vínculos coa lusofonía.
Vertente tecnolóxica
Este pasado novembro o proxecto aRi[t]mar estivo de plena actualidade tecnolóxica coa presentación do sitio play.aritmar.com, unha nova web para impulsar na mocidade a creación musical e poética galego-portuguesa e unha ferramenta para axudar a achegar a creación actual en galego á mocidade “a través dun medio no que esta se move con soltura, que é Internet”, explicou na presentación da ferramenta Valentín García.
A pltaforma en liña aglutina músicas e poesías dos diferentes artistas que resultaron gañadores ou optaron aos diferentes premios dentro de cada categoría nalgunha das edicións do aRi[t]mar, vixente desde 2016. En total, o servizo conta con máis dun cento de cancións e poesías de autores e autoras como Guadi Galego, Sés, Salvador Sobral, Ana Moura, Manuel Rivas, Lupe Gómez, Ana Luisa Amaral ou Nuno Júdice, entre moitos outros.
Os contidos son accesíbeis a través de vídeos musicais e vídeo-poemas, principalmente. Porén, a aplicación web tamén conta con versións escritas das poesías, así como das letras das cancións, e máis con material que tenta enriquecer a experiencia de uso.

PUBLICIDADE