A nova xornada TurisTIC converterá a provincia de Pontevedra no epicentro do turismo smart
venres, 8 de marzo do 2019
O
vindeiro 10 de abril vaise falar en Vigo de tecnoloxías ao servizo
do turismo, da promoción no mundo dos nosos moitos atractivos, de
mercadotecnia do noso e dos xeitos de conseguir que quen veña
recunque (fidelización) e contribúa a traer máis
visitantes. Estamos
a falar da segunda edición da Xornada TurisTIC O Turismo
Intelixente, que será o 10 de abril no museo Verbum de Vigo,
logo da primeira convocatoria celebrada o ano pasado no Castelo de
Soutomaior. A cita vén da man, novamente, da Deputación de
Pontevedra. Segundo fixo saber onte a súa presidenta, Carmela Silva,
“seguimos avanzando para converter a provincia de Pontevedra nun
destino turístico intelixente”.
Silva
engadiu que a xornada será “un gran evento no que o obxectivo será
promover a colaboración e o intercambio de boas prácticas entre
empresas do sector turístico, empresas tecnolóxicas e institucións
públicas do noroeste peninsular”. Asemade, engadiu que para
participar neste foro o prazo xa está aberto (até completar aforo)
é só é preciso cubrir o formulario dispoñíbel na
páxina web de SmartPEME.
A
cita, que se vai artellar en base a relatorios e mesas redondas,
achegará un contexto para avaliar colectivamente as oportunidades e
os desafíos para o sector turístico e a xestión de destinos
intelixentes. Vanse desenvolver tres mesas redondas: A gobernanza
nos destinos turísticos intelixentes, A innovación aplicada
á comercialización turística e A tecnoloxía. Presente e
futuro do sector". Nos relatorios abordarase a colaboración
público-privada nos destinos turísticos intelixentes e a
importancia dos datos para a xestión do destino, haberá un espazo
para a exposición de exemplos de turismo intelixente na provincia de
Pontevedra e achegarase unha presentación de solucións innovadoras.
A
presidenta provincial tamén adiantou que ao abeiro do foro
desenvolveranse dúas iniciativas “moi relevantes de apoio ao
tecido empresarial e á modernización do sector turístico”.
Trátase, por unha banda, do primeiro Desafío DESTinno e, pola
outra, do Centro de Demostración de Solucións Tecnolóxicas. A
primeira actividade, en colaboración con Zona Franca de Vigo, é “un
hackaton para desenvolver solucións innovadoras con
ferramentas de creacións de aplicacións", expuxo Silva, quen
engadiu que a proposta gañadora recibirá 3.000 euros en metálico,
entre outros galardóns. O Desafío DESTinno busca aproveitar o
talento da provincia para crear solucións innovadoras relacionadas
cos eixos dos destinos turísticos intelixentes (goberno, innovación,
tecnoloxía, accesibilidade e sustentabilidade). O desafío consiste
en crear unha solución innovadora empregando ferramentas de creación
de aplicacións.
O
foro, como dixemos, tamén terá un Centro de Demostración de
Solucións Tecnolóxicas. En colaboración co Clúster do Turismo de
Galicia e co Clúster TIC Galicia, 15 proxectos que hibridan turismo
e tecnoloxía porán en valor “o noso talento emprendedor",
destacou a presidenta da Deputación, que engadiu que “será un
escaparate único no que mostrar proxectos que combinen o mundo
tecnolóxico e o turístico”. Poderán participar nesta iniciativa
un máximo de 15 propostas, que deste xeito poderán presentar e
interactuar nunha sala con máis de 150 persoas especializadas do
sector.