A provincia de Ourense loce en FITUR os seus plans para ser turisticamente smart
venres, 25 de xaneiro do 2019
A
Deputación
de Ourense elixiu a feira FITUR de Turismo como palestra principal
para dar a coñecer o seu proxecto de turismo intelixente Hai un
Ourense para ti, descúbreo, unha plataforma para facilitar e
enriquecer a experiencia dos viaxeiros e favorecer a fidelidade e a
captación de máis turistas. Segundo fixo saber en Madrid o
presidente da entidade provincial galega, Manuel Baltar, trátase
dunha iniciativa innovadora que “nos situará como referente
turístico aproveitando os recursos das tecnoloxías máis
vangardistas”. Os ingredientes son os seguintes: unha boa ración
de ferramentas novas de comunicación e información e, por suposto,
todo o tesouro patrimonial, natural, etnográfico e paisaxístico dos
concellos.
A
iniciativa abéirase ao proxecto Provincia Intelixente da Deputación
(incluído no Plan Ourense 15-19), que ten entre outros obxectivos o
seguinte: situar a provincia “no cumio da vangarda tecnolóxica en
relación ás novas formas de xestionar os recursos turísticos”.
Hai un Ourense para ti é, como dixemos, unha plataforma
integral de turismo intelixente que busca ofrecer aos viaxeiros un
portal web avanzado de información; unha aplicación móbil de
turismo da provincia; un planificador de rutas baseadas nos gustos
dos usuarios; sistemas de Realidade Virtual; solucións de Realidade
Aumentada e, tamén, experiencias inmersivas 360º con fotografías e
vídeo.
O
proxecto foi aprobado na convocatoria de axudas de Destinos
Turísticos Intelixentes de Red.es e suporá para a provincia de
Ourense unha inxección económica de tres millóns de euros,
co-financiados aos 60 % polo Estado.
O
proxecto enmárcase na convocatoria de axudas de Destinos Turísticos
Intelixentes de Red.es, na que se seleccionaron 24 iniciativas de 9
Comunidades Autónomas, cun montante económico total de 68,3 millóns
de euros. Baltar salientou o traballo realizado por Fernando Suárez,
director da Área de Transparencia da Deputación, para acadar a
aprobación deste proxecto de vangarda tecnolóxica, “que sitúa a
entidade provincial na punta de lanza da creatividade e da xestión
da oferta turística, unha provincia como é a nosa, que destaca
polas súas singularidades termais e naturais e na preparación de
deportistas de alta competición, así como por unha riqueza
monumental, etnográfica e paisaxística das máis importantes do
mundo”.
Segundo
engadiu, a iniciativa permitirá aos viaxeiros dispoñer dun acceso
rápido, sinxelo e intuitivo de toda a información de interese dos
principais recursos turísticos (liña Ourense ao teu alcance);
de servizos personalizados baixo demanda (liña Sinte Ourense),
e terán acceso a experiencias inmersivas (liña Ourense guíate).
Baltar
tamén explicou que os aspectos clave do proxecto son a integración
nun único punto de toda a información turística da provincia por
medio do uso dun modelo tecnolóxico aberto (esquema Open Data)
sobre a que se fomente “a participación, o diálogo e a
colaboración entre os turistas a través das novas tecnoloxías e as
canles dixitais”.
Tamén
salientou o factor “interoperabilidade”, xa que a plataforma terá
capacidade para recadar información de “diferentes fontes de
datos”. Outro dos puntos fortes é a potenciación dos turismos
accesíbel, activo, termal e cultural, ademais de fomentar o carácter
innovador do sector turístico da provincia a través de solucións
TIC punteiras como son: información a gran escala (Big Data),
Realidade Aumentada, Realidade Virtual, portais web de potenciación
e mercadotecnia dixital.