A santiaguesa Ednon recibe un recoñecemento á súa aposta pola seguridade dos datos

A empresa santiaguesa Ednon, especializada en servizos avanzados de tecnoloxías da información e a comunicación, vén de ser obxecto dun importante recoñecemento ao que só un relativamente reducido firmas do panorama internacional teñen acceso. Trátase da certificación ISO 27001, unha acreditación que entre outras cousas avala o bo facer da firma galega en materia de seguridade da información e de cumprimento da lexislación vixente sobre datos persoais e propiedade intelectual, xestión de riscos e continuidade de negocio.
A certificación foi entregada á empresa Ednon o pasado venres 8 de xullo nun encontro celebrado na sede da firma no que participaron Gustavo Horn, conselleiro delegado de EQA España (entidade inglesa especializada na emisión destes avais), e máis Francisco Bao, presidente executivo de Ednon. Segundo fai saber a firma galega, “a obtención desta certificación permitirá a Ednon forma parte do reducido grupo de empresas españolas do sector das TIC que posúe as cinco principais acreditacións de calidade, ISO 20000, ISO 27001, CMMI, ISO 9000 e ISO 14001)”.
En palabras de Francisco Bao, “esta certificación permitiranos garantir ós nosos clientes un mellor servizo e poderán confiarnos os seus datos con total tranquilidade, xa que serán tratados coa máxima confidencialidade”.
Polo que atinxe ao proceso para a obtención deste aval de garantía, a firma galega salienta a súa rapidez e os bos froitos obtidos, cousa na que influíu sobremaneira “a experiencia previa en procesos anteriores de certificación, o compromiso da dirección e a interiorización na cultura da empresa da importancia da calidade”, engadiu Ernesto Rodríguez, director de Calidade de Ednon.
A consecución da certificación ISO 27001 é “un paso máis” na estratexia que Ednon se marcou dende a orixe da súa andaina de apostar pola mellora continua e o aseguramento da calidade. Así, no ano 2008 obtivo a certificación ISO 9001 do Sistema de Xestión da Calidade e no ano 2010 a certificación ISO 14001 do Sistema de Xestión Ambiental xunto coa certificación ISO 20000 de Xestión de Servizos de Tecnoloxías da Información. Este ano a empresa superou a avaliación e obtivo a clasificación de nivel de madurez 2 de desenvolvemento de software segundo o modelo CMMI.