A youtubeira galega Isabel Villanueva presenta en Londres Palabras da miña vida

Este domingo 6 de outubro, entre as 11,30 e as 13 horas, celebrarase en Londres a presentación do primeiro libro da youtuber Isabel Villanueva, mais coñecida coma Isashopaholic, no St John´s Hill Centre da capital inglesa. Trátase dun evento organizado pola asociación Rede Galega en UK (REGA-UK) en colaboración coa Axencia de Representación da escritora. A presentación vén cos mellores precedentes: o 2 de maio deuse a coñecer o libro O galego mola. Palabras da miña vida na Fnac da Coruña e logo comezou un periplo de éxito polas feiras máis relevantes da nosa terra. Agora, a Isashopaholic tócalle dar o chimpo a Londres.
A presentación ten entrada libre ata completar aforo. Ademais, servirase café, té e biscoito caseiro. Segundo informa a REGA-UK, as persoas que asistan á cita terán a oportunidade de falar coa autora, mercar o libro e levalo asinado. Tamén poderán descubrir “en primicia” unha pequena mostra da liña de complementos que, baixo a súa marca de Isashopaholic e O galego mola, a autora ten previsto lanzar a finais deste ano.
Isabel Villanueva Mariño, nacida en Carballo, lánzase ao mundo da comunicación dixital no 2010 cun vídeo en YouTube. A xeito de afección foi pendurando vídeos variados, de cousas cotiás que lle gustaba compartir. Pouco a pouco foi medrando en todas as redes sociais, pero hai dous anos foi cando deu o salto definitivo para adicarse profesionalmente á xestión da súa marca persoal e, máis tarde, crea O galego mola (https://www.ogalegomola.com), un lugar onde comparte coas seareiras e seareiros o idioma, lembranzas, impresións, reflexións, receitas en galego e lugares de Galicia.