ADACECO visita o CITIC para probar desenvolvementos de realidade virtual creados no centro

O pasado 10 de marzo, usuarios e profesionais sanitarios da Asociación de Dano Cerebral de Coruña (ADACECO) visitaron o Demostrador Tecnolóxico do Centro de Investigación TIC da Universidade da Coruña (CITIC) para probar diferentes desenvolvementos de Realidade Virtual creados por persoal investigador do centro, así como diversas propostas comerciais. Esta visita tivo a finalidade de recoller as opinións e suxestións tanto de usuarios como de sanitarios para mellorar os desenvolvementos actuais e para traballar na implementación de novas contornas de realidade virtual.
Segundo explica o CITIC, as aplicacións seleccionadas permitiron aos usuarios participantes ter un primeiro contacto coa experiencia de Realidade Virtual e traballar diferentes habilidades físicas e cognitivas dun modo ameno, motivador e seguro. Ademais, probaron unha tecnoloxía pouco estendida no ámbito comercial da realidade virtual: o dispositivo Leap Motion, que permite interactuar cos escenarios de realidade virtual directamente coas mans, sen necesidade de mandos.