Alfonso Rueda presidirá o acto de investidura de Ricardo Cao como reitor da UDC

venres, 12 de xaneiro do 2024 S. P.

Ricardo Cao, elixido este mes de decembro reitor da Universidade da Coruña para os próximos seis anos, protagonizará o acto de investidura do seu cargo á fronte da UDC, o vindeiro martes 16 de xaneiro, acto que estará presidido polo presidente da Xunta de Galicia, Alfonso Rueda. A cita erá lugar no Paraninfo da Reitoría ás 12:30 horas e, xunto co reitor, tomarán posesión dos seus cargos as persoas que forman o novo equipo de goberno da UDC.
Cao, investigador do CITIC (Centro de Investigación TIC) da UDC, vén de ser elixido o pasado 4 de decembro reitor da Universidade da Coruña para os vindeiros seis anos, obtendo 2.983 votos ponderados fronte aos 1.590 que tivo o outro candidato, Fermín Navarrina.
Ricardo Cao conta cunha ampla experiencia nos eidos da estatística e as matemáticas, que inclúen máis de 200 traballos de investigación e colaboracións con científicos de todo o mundo.
O seu labor destacouse especialmente no proxecto COVIDBENS, onde combinou o servizo público nun momento social crítico co desafío científico de desenvolver un modelo estatístico eficiente, aplicable non só ao COVID-19 senón tamén a outras problemáticas sanitarias como a gripe.
Desde 2008, o CITIC da UDC foi unha plataforma fundamental para Ricardo Cao, permitíndolle desenvolver proxectos singulares centrados na funcionalidade estatística. Recentemente, o Instituto Nacional de Estatística (INE) recoñeceu a versatilidade da súa traxectoria outorgándolle o Premio Nacional de Estatística, unha distinción colectiva que resalta a importancia do traballo en equipo na investigación.
O novo reitor destaca o factor humano como “o principal valor que define o seu traballo”; tamén para abordar cuestións tan de actualidade como a Intelixencia Artificial, “unha ferramenta de enormes posibilidades”, nas súas palabras.
Considera ademais, respecto do seu labor vindeiro á fronte da UDC, que unha das prioridades da universidade debe ser “estreitar a súa colaboración coas empresas e as administracións, así como fomentar a participación a todos os niveis, esencial nun mundo globalizado e para abrir o horizonte da UDC á internacionalización”. E engade: “Trátase de xerar unidades de investigación conxuntas que permitan competir no escenario global”. Neste sentido, a aposta estratéxica polos centros singulares como o CITIC, con profesionais TIC altamente demandados hoxe en día, “constitúe unha excelente panca de impulso”, avanza.

PUBLICIDADE